Әгәр ҙә бынан 10-15 йылдар элек өйҙә ултырып йәки Ер шарының ҡайһы урынында булып та эшләү мөмкинлеге тураһында һөйләһәләр, бер кем дә ышанмаҫ ине. Ә бөгөнгө көндә дистанцион эшләү бер кемде лә аптыратмай, киреһенсә, алдынғы компания хеҙмәткәрҙәренең күбеһе онлайн хеҙмәттә. Бынан һәр кем ота - компанияға әллә ниндәй ҙур биналар төҙөргә йәки ҡуртымға алырға түгел, етмәһә, хеҙмәткәргә юлға киткән ваҡытын, аҡсаһын файҙалы тотонорға мөмкинлек бирелә.

Мин үҙем дә ошондай ситтән тороп эшләүселәр рәтендәмен - IT белгесемен. Һәм үҙемдең белемемде төп хеҙмәт урынымда эш хаҡы алыуға ғына түгел, ә өҫтәмә килем килтереү өсөн дә ҡулланам. Интернет, компьютер һәм төрлө программалар менән дуҫ булыусы йәштәр күп хәҙер, уларға үҙ шөғөлөм тураһында һөйләп үткем килә.
Бөтә эшмәкәрлек компьютерға, виртуаль донъяға күсеп бөттө тиерлек. Шул иҫәптән фото төшөрөү өсөн дә элекке һымаҡ әллә ниндәй махсус аппарат кәрәкмәй - ҡулында смартфон булған һәр кем фотоһәүәҫкәр. Көнөнә унлаған, йөҙәрләгән фото эшләргә мөмкин. Шул уҡ ваҡытта элекке ваҡыттарҙа төшөрөлгән һәм ҡағыҙ форматта һаҡланған фотолар ҙа һәр ғаилә өсөн ҡәҙерле ҡомартҡы. Ләкин ваҡыт үтеү менән улар төҫһөҙләнә, тоноҡлана, ситтәре йыртыла һәм башҡалар. Ошондай ваҡытта минең хеҙмәткә һорау тыуа ла инде. Мин элекке фотоһүрәттәрҙе төҙөкләндереү менән булам. Аҡ-ҡара, төҫлө фотолар, портрет йәки күмәк фото - барыһын да махсус компьютер программалары ярҙамында тәүге торошона ҡайтарырға була. Бының өсөн ни бары төрлө редакторҙарҙа эшләй белергә кәрәк. Артабан тырышлыҡ, бер аҙ ваҡыт ҡына кәрәк. Тәүҙә бер-ике кешегә фотоларын эшләп биргәндә артабан "сарафан радиоһы" үҙ эшен эшләй һәм клиенттар һаны күбәйә. Бары тик һан артынан ҡыуып, эштең сифатын боҙмаҫҡа кәрәк, сөнки яҡшы дан кеүек үк, насар дан да үҙеңдән алда йөрөй.
Эш башлау өсөн әллә ни ҙур сығымдар кәрәкмәй, ә шул уҡ ваҡытта бар күңелде һалып, яратып башҡарғанда был өлкәлә етерлек кенә килем алырға була. Мәҫәлән, мин бәләкәйерәк портрет фотоларҙы 300 һумға эшләйем, күмәк фотоларҙы төҙөкләндереү ҡиммәтерәк, ғөмүмән, һәр кем үҙенең эшенә хаҡты үҙе ҡуя ала. Клиенттар табыу өсөн тәүге фотоларҙы, реклама йәһәтенән, бушлай ҙа эшләп бирергә мөмкин.
Бөгөнгө көндә өҫтәмә килем алырҙай шөғөлдәр күп, мөмкинлектәр ҙә бар, барыһы ла кешенең теләгенән тора, бары тик заман технологияларын уңышлы һәм дөрөҫ ҡуллана белергә генә кәрәк. Беҙҙең эш менән булғанды балалар ҙа күреп, буш ваҡытты файҙалы һәм килемле итеп уҙғарып булыуын белеп үҫһендәр.

Шайморат ҒӘЛИН.
"Киске Өфө" гәзите, №12, 2023 йыл

КИРЕ СЫҒЫРҒА