Күпселектең яңы башҡортто, әгәр ҙә бында яңырыуға йөҙ борған кеше хаҡында һүҙ барһа, "яңы урыҫ"тың күсермәһе рәүешендә ниндәйҙер мөғжизә менән сереп байыған кеше итеп күрергә теләүе аптырата. "Яңы башҡорт" "яңы урыҫ" түгел.

Йәнәһе, уның мотлаҡ бай кеше йә танылған сәхнә йондоҙо булыуы шарт. Ундай башҡорттарҙың да йортонда булырға тура килгәне бар, күбеһенең өйөндә бер башҡортса китап, гәзит-журнал күрмәҫһең, араларында үҙ ғүмерендә бер китап уҡымағандары ла бар. Етмәһә, байлыҡ принцибына ҡарап, балаларының да теләһә ниндәй милләт вәкиле менән ғаилә ҡороуына күҙ йомоп ҡарай бәғзеһе. Һөҙөмтәлә "яңы башҡорт" тигәнеңдең ейән-ейәнсәрҙәре бөтөнләй башҡа милләт вәкиле булып китә, уның ҡаны, заты, үҙе лә бүтәндәр өсөн сеймалға әүерелә. "Сеймал" икән, тураһын әйткәндә, ул "яңы" ғына ла түгел, ғөмүмән, башҡорт түгел.
Миңә ҡалһа, замандың яңы башҡорто - ул егерме икенсе быуатҡа балаларын, ейән-ейәнсәрҙәрен башҡорт милләте вәкиле итеп сығара алыусы, ата-олаталарының рухи эстафетаһын киләсәк быуындарына тапшыра алыусы башҡорт. Ошо ғәмәлдәрҙе тормошҡа ашырыу өсөн кәрәкле сифаттарға эйә булһа, ана шулдыр ул яңы башҡорт. Минеңсә, яңы башҡорттоң асылын уның төп маҡсаты билдәләйҙер. Киреһенсә булған осраҡта йәшәүебеҙҙең дә мәғәнәһе юҡ бит.

Әхмәр ҒҮМӘР-ҮТӘБАЙ.
"Киске Өфө" гәзите, №18, 2023 йыл

КИРЕ СЫҒЫРҒА