Өйгә тиҫтәләгән баҫма килһә лә, һәр кемдең яратып уҡыған һәм иң беренсе ҡулына алған гәзит-журналы була. Минең өсөн шундай гәзиттәрҙең береһе - "Киске Өфө".

"Киске Өфө"нө республикабыҙҙың төп гәзиттәре исемлегенә индерәм һәм был бер ҙә хата ла, яңылышыу ҙа түгел. Үҙенең 16 битенә ул тормошобоҙҙоң бөтә өлкәләрен дә тулы кимәлдә "һыйҙыра". Баҫма республика, ил һәм хатта донъя сәйәсәтен дә урап үтмәй, бөгөнгө менән бер рәттән, тарихты ла киң яҡтырта, һаулыҡҡа ҡығылышлы йөкмәткеле, файҙалы мәғлүмәт менән дә бүлешә. Ошо урында тағы бер нәмәне билдәләп үткем килә: уҡыусы иғтибары артынан ҡыуып, нисек тә булһа иҫте китәрергә тырышып, әллә ниндәй аңлайышһыҙ һәм беҙҙең тормоштан бөтөнләй алыҫ булған сәләмәтлек ысулдарын яҙмай гәзит. Уның битендә сыҡҡан ниндәй кәңәште алһаң да, составында үҙебеҙ күреп-белгән, ишетеп үҫкән үлән, тамыр, йәшелсә-емеш һәм башҡа шундай саралар ғына. Был бик уңайлы һәм, миңә ҡалһа, ышаныслы.
Мин "Киске Өфө"гә тулыһынса ышанам. Бөгөнгө көндә "ышаныс" төшөнсәһе юғалып та барған кеүек, һәр кем үҙен һаҡ тота, уҡығанына ла әллә ни ышанып бармай. Ә "Киске Өфө"гә был йәһәттән мин һүҙ тейҙерә алмайым. Гәзит үҙ битендә баҫҡан һәр һүҙгә ҡарата яуаплылыҡ тойоп эшләй һәм йәшәй. Был үҙ уҡыусыларына ҡарата булған ихтирам тураһында һөйләй.
Өҫтән-мөҫтән генә, "килде - китте", "үтте - эшләнде" тип кенә яҙып сығып килгән ҡайһы бер баҫмаларҙан айырмалы рәүештә, "Киске Өфө"лә донъя күргән һәр материал төплөлөгө, мәғлүмәтлеге, төрлөлөгө менән айырылап тора. Һәр бер мәҡәлә уны әҙерләгән журналист күңеле аша ғына түгел, ә баҫманың баш мөхәрриренең йөрәге, үткер күҙе һәм талапсан ҡулы аҫтынан үткәне күҙгә асыҡ сағыла.
Гәзиттең тағы бер күңелемә яҡын сифаты - яҙылыу теленең уҡымлы, аңлайышлы булыуы. Баҫма ҡыҙыҡлы, күңелде ыңғайға көйләй, аң-даирәне киңәйтә, ышаныс өҫтәй.

Ғәлим АТАУЛЛИН.
Өфө ҡалаһы.
"Киске Өфө" гәзите, №20, 2024 йыл

КИРЕ СЫҒЫРҒА