Хөрмәтле дуҫыбыҙ!

“Киске Өфө” тип аталған башҡорт телендәге

аҙналыҡ гәзиттең рәсми сайтында сәләмләйбеҙ һине.

...Ошо һүрәткә күҙ һал әле. Сәскә тулы кәрзинен тотҡан булып, ҡайҙалыр, кемгәлер ашыҡҡан ҡыҙсыҡҡа ҡарап, моғайын, күңелдәрегеҙҙе матур тойғолар биләр, йөҙөгөҙгә йылмайыу яҡтыһы яғылыр. Һоҡланып һирпелгәндән һуң телгә шундай һүҙҙәр килер: “Кемдең генә балаһы икән был?..”

Ошо бала халәтендә генә әле беҙҙең баҫмабыҙ ҙа. Ул да үҙ уҡыусыларына, ошо бала һымаҡ, мөлдөрәмә тулы изгелек, күңел һәм зиһен яҡтылығы, рух бөтөнлөгө, кәйеф көрлөгө, ихласлыҡ һәм аҡыл нуры илтә. Өфө балаһы, Өфө баҫмаһы ул. Әммә уның һүҙе бөтөн Башҡортостанға, барлыҡ башҡорт донъяһына төбәлгән, уның нуры, уның йылыһы бар тарафтарға етерлек. Тик ҡабул итә генә күрһендәр...

Маҡсатыбыҙ – киң мәғлүмәт саралары баҙарында бары тик уҡыусы мәнфәғәтен ҡайғыртыусы, уҡыусы күңелен күреүсе, һүҙ бутҡаһынан, арзан ҡиммәттәрҙән ҡасҡан, һәр кемде юғарыға ҡарап фекер итергә әйҙәгән гәзит булараҡ үҙ урыныбыҙҙы алыу. Ошо йүнәлештә ижад итәбеҙ, артабан да шулай дауам итеү ниәтебеҙ. Әйҙәгеҙ, бергә булайыҡ, бергә-бергә фекер ҡорайыҡ, бергә уйлайыҡ, бергә ҡыуанайыҡ.