Ураҙала нисек дөрөҫ туҡланырға икәнен белмәү ошо изге ғәмәлдең бәҫен ебәрергә лә мөмкин. Шуға ла бер нисә кәңәш тәҡдим итәбеҙ.

Ауыҙ асыу (ифтар) ваҡыты еткәс, ашарҙан алда 0,5-1 литр бүлмә температураһындағы газландырылмаған минераль һыу эсергә һәм 3-5 бөртөк хөрмә йәки башҡа төрлө киптерелгән емеш (йөҙөм, күрәгә, ҡара емеш) ашарға.
Төп ризыҡланыуҙа тиҙ эшкәртелеүсе аҙыҡтарға - еләк-емеш (банан менән авокадонан башҡа), йәшел тәмләткес үләндәр, үҫемлек майы һалмайынса ғына салат, йәшелсәнән еңелсә аш, һөт ризыҡтары тәҡдим ителә. 40-60 минуттан һуң һыу йә үлән сәйе эсегеҙ. Ит, он ризыҡтары, майлы, ҡырҡыу аҙыҡтар ашамағыҙ, сәй, кофе, газлы эсемлектәр эсмәгеҙ.
Иртәнге сәхәрҙә иһә, киреһенсә, оҙаҡ эшкәртелеүсе һоло, арпа ярмаһы, ҡарабойҙай, һоро дөгө бутҡаларына, сәтләүек һәм ҡуҙаҡлыларға өҫтөнлөк бирегеҙ. Сөгөлдөр, кишер, кәбеҫтә, таш ҡабаҡты сей килеш тә, бешереп тә ашарға мөмкин. 200-300 мл һыу эсеү етеп торор, юғиһә, ашалған ризыҡ насар эшкәртелер.
Был мәлдә еләк-емеш, балыҡ, ит, шулай уҡ майлы, ҡырҡыу, тоҙло һәм ыҫланған ризыҡтарҙан тыйылыу яҡшы, сөнки улар көндөҙ һыуһатасаҡ икәнен белеп ҡуйығыҙ.
Төнгө мәлдәрҙә йоҡо туймауы ла ихтимал, ләкин ваҡытты дөрөҫ файҙаланғанда, был хәлде еңеләйтергә була. Шуны иҫтә тотоғоҙ: көндөҙгө сәғәт 13.00-тән 16.00-ға тиклемге арала 40-60 минут йоҡлап алыуға ваҡыт бүлегеҙ. Көндөҙгө йоҡонан ҡыйынлыҡ кисергән хәлдә, һалҡынса душ ҡойоноғоҙ. Бында һәр кемдең үҙен нисек тойоуына бәйле. Эҫенән һәм көслө хис-тойғоға бирелеүҙән һаҡланығыҙ. Һәр ваҡыт йылмайырға, яғымлы булырға тырышығыҙ һәм фәҡәт изге хәбәрҙәр генә һөйләгеҙ.

КИРЕ СЫҒЫРҒА