Ил Президенты Владимир Путин һәм Башҡортостан Башлығы Радий Хәбиров осрашыу барышында кәңәшләшкән һорауҙар араһында Республика һуғыш ветерандары клиник госпиталенең яңы бинаһын төҙөү мәсьәләһе лә күтәрелде. Республика етәксеһе Президенттан дауахана төҙөлөшөн федераль инвестициялар программаһына индереүҙе һораны.

Проект буйынса, яңы госпиталдең дауалау корпустарында 550 койка урынлаштырырға һәм бер сменала 300 ауырыуҙы ҡабул итерлек поликлиника эшен яйға һалырға ниәтләйҙәр. Биналарҙың дөйөм майҙаны 45 мең квадрат метр тирәһе тәшкил итәсәк. Уны "Йәшел сауҡалыҡ" шифаханаһы территорияһында урынлаштырыу һәм баш ҡаланың 450 йыллығына төҙөлөш эштәрен тамамлау күҙаллана. "Бөгөн һуғыш ветерандары госпитале "Ветерандар тураһында" законға ярашлы бик ҙур медицина ярҙамы күрһәтә һәм ул урынлашҡан бина тотош яңырыу талап итә", - ти Республика һуғыш ветерандары клиник госпиталенең баш табибы Хәлил Мостафин.
Хәтерегеҙгә төшөрәбеҙ, әлеге көндә госпиталь урынлашҡан бина 1860 йылда төҙөлгән һәм тәүҙә шәхси йорт, аҙаҡ Өфө епархияһы ҡатын-ҡыҙҙар училищеһы булған. Бөйөк Ватан һуғышы йылдарында бында эвакуацияланған госпиталь һәм Сеченов исемендәге Мәскәү медицина институты урынлашҡан. "Был йылдар эсендә тарихи бина ярайһы уҡ эшлектән сыҡҡан. Уны һаҡсыл рәүештә яңыртып төҙөү өсөн ваҡыт һәм күп сығымдар талап ителә, шуға госпиталде икенсе урынға күсерергә кәрәк", - ти был турала Күсемһеҙ мәҙәни мираҫ объекттарын һаҡлау һәм файҙаланыу буйынса ғилми-етештереү үҙәге директоры Данир Ғәйнуллин.

"Киске Өфө" гәзите, №2, 2023 йыл

КИРЕ СЫҒЫРҒА