Быйыл республика баҫыуҙарында уңыш йыйыуҙа 4 мең комбайн эшләй. Был хаҡта төбәк Ауыл хужалығы министрлығынан хәбәр итәләр.

Ҡеүәтле техника паркы тәүлегенә 60 мең гектарға тиклем иген һәм ҡуҙаҡлы иген культураларын һуғып алырға мөмкинлек бирә. Алдағы йылдарҙа күрһәткесте 100 мең гектарға тиклем еткереү планлаштырыла. Быға өлгәшеү өсөн киләһе биш йылда өҫтәмә рәүештә кәмендә 1200 иген йыйыу комбайны һатып алыу талап ителә, тип билдәләй белгестәр. Ағымдағы йылдың тәүге яртыһында республика аграрийҙары 6 миллиард һумлыҡ 928 ауыл хужалығы машинаһы һатып алған. Шул иҫәптән төрлө маркалы 152 трактор, 58 иген йыйыу комбайны, 6 үҙйөрөшлө мал аҙығы йыйыу комбайны, 58 үҙйөрөшлө һиптергес, 250-нән ашыу берәмек тупраҡ эшкәртеү һәм сәсеү машиналары һәм ҡоралдары һәм башҡа техника төрҙәре. Әле 44 районда иген һәм ужым рапсын урып-һуғыу бара. 3 авгусҡа ҡарата 600 мең тонна иген һуғылған, уртаса уңыш һәр гектарға 36 ц-ҙан ашыу тәшкил итә. "Был аҙнала элеваторҙар әҙерлеген тикшереүҙе тамамлайбыҙ. Республикалағы 34 элеватор һәм урындарҙа булған келәттәр ҡеүәте бер юлы 4,2 миллион тонна иген һәм майлы культураларҙы, күҙаллаған төшөмдөң бөгөнгө күләмен, һаҡларға мөмкинлек бирә", - ти республика Хөкүмәте вице-премьеры - ауыл хужалығы министры Илшат Фәзрахманов.

"Киске Өфө" гәзите, №31, 7 - 13 август 2026 йыл

КИРЕ СЫҒЫРҒА