М. Ғафури исемендәге Башҡорт академия драма театры ошо көндәрҙә 104-се ижад миҙгелен ябырҙан алда тамашасыларына мөғжизәле бүләк - "Заятүләк менән Һыуһылыу" спектаклен тәҡдим итте. Ғаилә менән килеп ҡарау өсөн тәғәйенләнгән яңы тамаша башҡорт халыҡ эпосына нигеҙләнеп ҡуйылған.

Спектаклде билдәле режиссер, Ш. Бабич исемендәге Дәүләт республика йәштәр премияһы лауреаты Илсур Ҡаҙаҡбаев ҡуйҙы, ә пьесаны Мәжит Ғафуриҙың әҙәби эшкәртеүендәге эпосҡа таянып, йәш драматург Мария Малухина яҙған. Уның интерпретацияһында башҡорт халыҡ эпосы йәш кешенең үҙ юлын эҙләүе, дуҫлыҡ һәм тоғролоҡ, маҡсатҡа ирешеүсәнлек, туған-ара татыулыҡ һәм, әлбиттә, мөхәббәт тураһындағы тарихҡа әүерелде. Быға саҡырылған белгестәр - рәссам Ася Бубнова, композитор Магуля Мезинова, хореограф Илья Оши, яҡтылыҡ буйынса рәссам Сергей Скорнецкий, визуаль эффекттар буйынса рәссам Михаил Теребиленконың оҫталығы ла булышлыҡ итте.
Ҡоро ерҙә һәм һыу аҫты батшалығында барған ваҡиғаларҙы сағылдырыу өсөн заманса технологиялар, ҡорамалдар оҫта ҡулланылған. Компьютер һәм яһалма интеллект мөмкинлектәрен ҡулланып ижад ителгән бихисап матур тамашаларҙы күреп, күнегеп бөткән балаларыбыҙ күңеленә юл таба белде саҡырылған белгестәр. Шуға ла, бәлки, башҡорт халыҡ эпосы геройҙарының тышҡы ҡиәфәттәре башҡа халыҡтарҙың йәнһүрәттәрҙә кәүҙәләндерелгән мифик заттарына ла оҡшап киткәндәй тойолдо. Сәхнәгә күтәрелгән һәр актер тәү минуттарҙан уҡ тамашасы иғтибарын яулай һәм үҙе артынан әкиәт донъяһына илтә алды.
Әйткәндәй, төп ролдәрҙе йәш актерҙар Линар Бәйегетов (Заятүләк) һәм Айым Сөләймәнова (Һыуһылыу) башҡарҙы. Улар был сағыу спектаклде эшләүе ҡыҙыҡлы булыуын, үҙ ролдәрен оло яуаплылыҡ менән уйнауҙарын телгә алды. Шулай уҡ спектаклдә Хөрмәтулла Үтәшев - Диңгеҙхан батша, Алмас Әмиров - Йәноҙаҡ вәзир, Алһыу Ғәлина - ханбикә, Урал Әминов, Артур Кәбиров һәм Артур Ҡунаҡбаев - ағалы-ҡустылы ендәр, Гөлнара Ҡаҙаҡбаева - мәсекәй әбей, Юнир Ҡоланбаев - аждаһа, Айнур Ситдиҡов - толпар, Зилиә Хәлилова - өкө, Руслан Ғәлимов - алабуға, Айҙар Шәмсетдинов - Байназар ролдәрен башҡарҙы.
Диңгеҙ төбөндәге төрлө тереклекте лә оҫта кәүҙәләндерҙе артистар. "Бик борон ижад ителеүенә ҡарамаҫтан, "Заятүләк менән Һыуһылыу" башҡорт халыҡ эпосы бөгөн дә актуаль - ул мөхәббәт, яҡшылыҡ һәм яуызлыҡ, тормошобоҙҙоң әхлаҡи нигеҙҙәре тураһында. Пьеса авторы Мария Малухина һәм ҡуйыусы төркөм менән беҙ серле һәм ғәжәйеп һыу аҫты батшалығын яңыса күрһәтергә, ғаилә менән килеп ҡарарлыҡ спектакль эшләргә теләнек", тине ҡуйыусы режиссер Илсур Ҡаҙаҡбаев", -тип хәбәр иткәйне театрҙың матбуғат хеҙмәте. Ижади төркөмдөң был ниәте тормошҡа ашыуына премьераны килеп ҡараған һәр тамашасының театрҙан йөҙө балҡып, күтәренке кәйеф менән сығыуы дәлил. М. Ғафури исемендәге Башҡорт академия драма театрының был спектакле лә сәхнәнән оҙаҡ төшмәҫ, моғайын.

Камила ҒӘЛИЕВА.
"Киске Өфө" гәзите, №26, 2024 йыл

КИРЕ СЫҒЫРҒА