![](up/photos/_2024/2824/yng.jpg)
Бейек тау башында урынлашҡан, төрлө яҡтан йылғалар менән йыуылған күркәм баш ҡалабыҙ үҙенсәлекле лә, мөһабәт тә, матур һәм заманса ла йәшәү урыны. Оҙаҡламай Өфө ҡәлғәһенең 450 йыллығын билдәләйәсәкбеҙ, һәм беҙ ошо ваҡиғаның шаһиттары булыу менән икеләтә бәхетлебеҙ.
Ошо сара алдынан Өфө ҙур төҙөлөш майҙанын хәтерләтә: йорттар, социаль һәм спорт объекттары төҙөлә, юлдар төҙөкләндерелә, яңы райондар барлыҡҡа килә. Йәй миҙгелендә был эшмәкәрлек тағы ла әүҙемләшә төшөүен баш ҡалала йәшәүсе һәр кем асыҡ тоя, сөнки унда-бында урамдар ябыла, юлдар ситендә һыу һәм йылытыу торбаларын тикшереү өсөн ҡаҙылған соҡорҙар һаны арта, төҙөлөш транспорты геүләп тора. Ошондай эштәр барышында ямғыр канализацияһы һәм таҙартыу ҡоролмаларына ҙур иғтибар бүленһә икән, тигән теләк менән яҙам. Һуңғы ваҡытта баш ҡалаға ғына түгел, ә тотош республикаға ябырылған ҡойма ямғырҙар Өфө урамдарын оло һыуҙан ҡотҡара алмағаны күҙгә ташланды.
Ҡала маршруттарында йөрөү өсөн хаҡ артты, тип зарланғандар бар. Бөтә өлкәлә лә хаҡтар артыуы барғанда, бензин көндән-көн ҡыйбатланғанда, "Башавтотранс" компанияһына был юлға бармайынса мөмкин дә булмағандыр. Ләкин компания етәкселеге үҙенең файҙаһы тураһында ғына түгел, ә автобуста йөрөүсе халыҡ хаҡында ла уйлаһа ине әҙерәк. Күпселек автобустарҙа кондиционер эшләмәй, пассажирҙар ғына түгел, хатта водителдәр ҙә эҫенән йонсоп бара. Был, минеңсә, пассажирҙарҙың хәүефһеҙлеге өсөн бик ҡурҡыныс. Ошо хәлгә иғтибар бүленһә ине.
Дөйөмләштереп әйткәндә, Өфөлә килеп тыуған проблемаларҙы хәл итеү өсөн күп эштәр башҡарыла, шул уҡ ваҡытта иғтибар бер йүнәлештә генә түгел, ә төрлө өлкәне үҙ эсенә алһа, тағы ла яҡшы буласаҡ, тип кенә әйтмәксе инем.
Зәбир СӨНӘҒӘТУЛЛИН.
"Киске Өфө" гәзите, №28, 2024 йыл
КИРЕ СЫҒЫРҒА
|