Милли батырыбыҙ, сәсән, шағир-импровизатор, 1773-1775 йылдарҙағы Крәҫтиәндәр һуғышы полководецы Салауат Юлаевтың тыуыуына 260 йыл тулыуға арналған "Салауат йыйыны" республика фольклор байрамы 5 июлгә күсерелде. Ул йылдағыса Салауат районы Малаяҙ ауылы эргәһендә үтәсәк.

Бар тормошо һәм эшмәкәрлеге батырлыҡ, илһөйәрлек өлгөһө булған Салауат Юлаевтың исеме һәм образы аша йәш быуында үҙ халҡыңа, уның тарихи үткәненә һөйөү, милли ғорурлыҡ, ололарға ихтирам тойғоларын тәрбиәләү маҡсатында үткәрелгән байрам сиктәрендә Президент грантына лайыҡ булған "Йүрүҙән" этно-фестивале буласаҡ. Фестиваль программаһында "Батыр тоҡомо", "Йөҙөк ҡашы - Зөләйха", этник төркөмдәр араһында "...Егерме лә ике йәшендә" конкурстары, халҡыбыҙҙың традицион бәйгеләре, шул иҫәптән С. Юлаев исемендәге призға көрәш ойошторола.
"Батыр тоҡомо" этноконкурсы 16-25 йәшлек егеттәр араһында үтә. Улар түбәндәге конкурстарҙа көс һынашасаҡ: 1) Презентация (үҙ төбәгенең этнографик кейемен, ҡоралдарҙың макетын күрһәтергә; шәжәрәһен, ырыу батырҙарын, тамғаһын, ҡошон, ағасын, оранын белергә тейеш). 2) Ҡобайыр, халыҡ йыры, ҡурайҙа йәки башҡа милли музыка ҡоралдарында уйнау - теләк буйынса. 3) С. Юлаевтың шиғырҙарын һөйләү буйынса поэтик ярыш. 4) Халыҡ бейеүе.
"Йөҙөк ҡашы - Зөләйха" этноконкурсында 16-22 йәшлек ҡыҙҙар ҡатнаша. Шарттар егеттәр араһында үткән конкурстыҡы кеүек.
"...Егерме лә ике йәшендә" конкурсы репертуарында С. Юлаевтың эшмәкәрлеге, ижады темаһын асыусы халыҡ йыры, көйө булған этнотөркөмдәр араһында уҙа. Икенсе әҫәр - төркөмдөң һайлауы буйынса.
"Көмөш өҙәңге" эшҡыуарлыҡ инициативалары һәм кәсепселек конкурсында кәсепселек эшмәкәрлеген алып барған предприятиелар, шәхси эшҡыуарҙар, айырым оҫталар, рәссамдар, уҡыу йорттары, түңәрәктәр һәм ижади коллективтар ҡатнаша. "Исемем - Салауат" парадында республика райондары һәм ҡалаларынан батыр исемен лайыҡлы йөрөткән Салауат атлы ир-егеттәр ҡатнаша.
"Салауат" бейеү флешмоб-ритайымы 4 июль көнө кис ойошторола. Унда ҡала һәм райондарҙан килгән бейеү төркөмдәре ҡатнаша. Ул башҡорт халыҡ һәм заманса хореография элементтарынан торған халыҡ уйындары, бейеүҙәрҙән торасаҡ. Милли биҙәнеү әйберҙәре, яулыҡтар мотлаҡ.
Байрамда "Рәсәйҙең рәссамдар союзы" Бөтөн Рәсәй ижади йәмәғәт ойошмаһының төбәк бүлексәһе асыҡ һауала рәссамдар өсөн конкурс уҙғара.

Республика халыҡ ижады үҙәге.

КИРЕ СЫҒЫРҒА