24 ғинуарҙа Башҡортостанға эш сәфәре менән Рәсәй Федерацияһы Президенты Владимир Путин килде. Өфө аэропортында уны республика Башлығы Рөстәм Хәмитов ҡаршыланы.

Ил етәксеһе визиты барышында Өфө моторҙар эшләү берекмәһенең (УМПО) вертолеттар двигателдәре узелдарын әҙерләү һәм йыйыу производство-технологик үҙәге, шулай уҡ МС-21 авиалайнеры өсөн ПД-14 двигателе узелдары һәм деталдәре, газ һурҙырыу агрегаты һәм башҡа продукция экспозицияһы менән танышты.
Ҡыҫҡа экскурстан һуң Владимир Путин Ростех дәүләт корпорацияһына ингән УМПО предприятиеһында оборона-сәнәғәт комплексы ойошмалары тарафынан граждандарға тәғәйен продукция етештереүҙе төрләндереү (диверсификациялау) мәсьәләләре буйынса кәңәшмә үткәрҙе. Бының әһәмиәтен ул киләсәктә Оборона министрлығы заказдары кәмейәсәге, дәүләт оборона заказдары күләме ҡыҫҡарасағына бәйләне. Ил башлығы билдәләүенсә, 2025 йылға ОПК предприятиеларында сығарылған граждандар өсөн тауарҙар өлөшө 30 процентҡа тиклем үҫергә, ә 2030 йылға 50 процентҡа етергә тейеш. Шул уҡ ваҡытта уның юғары сифатлы, һәр кем һатып алырлыҡ хаҡта булыуы мотлаҡ.
Республика Башлығы Рөстәм Хәмитов менән осрашыу барышында Владимир Владимирович төбәктең көнүҙәк социаль-иҡтисади үҫеше мәсьәләләре буйынса фекер алышты. Республика етәксеһе РФ Президентының 2012 йылдың май указдарында сағылыш тапҡан йөкләмәләрҙең үтәлеше менән таныштырҙы һәм төбәктә эш хаҡының уртаса 3,4 процентҡа артыуын билдәләне. Әңгәмә барышында шулай уҡ нефть химияһы комплексы үҫешенең төрлө аспекттары ҡаралды, республикала иғлан ителгән Ғаилә йылында балалы ғаиләләргә ярҙам саралары хаҡында бәйән ителде.
Шулай уҡ был көндө Рәсәй Президенты Владимир Путин Рәсәй мосолмандарының Үҙәк диниә назараты рәйесе, Баш мөфтөй Тәлғәт Тажетдин менән осрашты. Әңгәмә алдынан ул Рәсәйҙең иң боронғо мәсеттәренең береһе - Беренсе Йәмиғ (Соборная) мәсете менән танышты. Бина 1830 йылда төҙөлә, мәсет ҡарамағында "Ғосмания" мәҙрәсәһе, ике класлы рус-башҡорт училищеһы эшләй. 1960 - 1992 йылдарҙа ул Өфөлә ғәмәлдәге берҙән-бер мәсет була. Ил башлығы Башҡортостанда мәсеттәр һаны артыуын ыңғай баһаланы һәм бының традицион диндәрҙең үҫеше сағылышы икәнен билдәләне, республикала алып барылған ислам белгестәрен әҙерләү буйынса ыңғай фекер белдерҙе.

КИРЕ СЫҒЫРҒА