"Башҡорт китабы топ-100+" акцияһына килгән хаттарҙы барлауҙы дауам итәбеҙ. Һеҙ ҙә башҡорт әҙәбиәтендә һәр быуын кешеһенең иғтибарына лайыҡ әҫәрҙәрҙе/китаптарҙы тәҡдим итеүҙән туҡтамағыҙ, хөрмәтле гәзит уҡыусылар!

91. Ибраһим Абдуллин "Хуш, Рим!" романы. Ибраһим Абдуллиндың драма әҫәрҙәре генә түгел, проза әҫәрҙәре лә иғтибарға лайыҡ. Уның Бөйөк Ватан һуғышы ваҡиғаларына арналған дүрт романы бар. Мин китап уҡырға яратыусыларға шуларҙың береһен - "Хуш, Рим!" тип аталған романын уҡырға тәҡдим итәм. Әҫәрҙә алыҫ Италия ерҙәрендә фашистарға ҡаршы көрәшкән Өфө яҙыусыһы Алексей Коляскин яҙмышы тураһында һүҙ бара. Партизандарҙың батырлыҡтары, бер кеше яҙмышы аша бөтә ил, донъя халыҡтары яҙмышы сағылыш таба был әҫәрҙә.

92. Әмир Гәрәев "Диңгеҙ бүреһе, йәнә бүтән хикәйәләр" йыйынтығы. Китап уҡырға яратҡан һәр кемдең күңеленә хуш килгән жанрҙар, әҫәр темаһы була. Берәүгә романтика менән һуғарылған нәфис әҙәбиәт оҡшаһа, икенсегә беҙ күреп белмәгән серле планеталар тураһында фантастик әҫәрҙәрҙе, йә, киреһенсә, ысынбарлыҡҡа нигеҙләнеп яҙылған тарихи художестволы әҙәбиәтте яҡын күрә. Ә бына Әмир Гәрәевтың әҫәрҙәре диңгеҙ мажараларын, моряктар тормошо, сәйәхәттәр тураһында уҡырға яртҡан кешеләр өсөн яҙылған. Был йыйынтығында авторҙың повесы һәм хикәйәләре тупланған.

"Башҡорт китабы топ-100+" акцияһына ҡушылығыҙ, үҙегеҙ уҡыған башҡорт китаптары/әҫәрҙәре араһынан иң-иңдәрен һайлап, шулар тураһында редакциябыҙға төбәп хаттар яҙығыҙ. Йәки "Бәйләнештә" социаль селтәрендәге "Киске Өфө" гәзите" төркөмөндә махсус булдырылған "Башҡорт китабы топ-100+" акцияһы" тип аталған фекер алышыу битендә "#башкитап" хештегы ҡуйып, үҙ фекерегеҙҙе белдерегеҙ!

Рубриканы Сәриә ҒАРИПОВА алып бара.

КИРЕ СЫҒЫРҒА