"Башҡорт китабы топ-100+" акцияһына килгән хаттарҙы барлауҙы дауам итәбеҙ. Һеҙ ҙә башҡорт әҙәбиәтендә һәр быуын кешеһенең иғтибарына лайыҡ әҫәрҙәрҙе/ китаптарҙы тәҡдим итеүҙән туҡтамағыҙ, хөрмәтле гәзит уҡыусылар!

93. Суфиян Поварисов "Яҙмыш ҡорбандары" роман. Бөйөк Ватан һуғышы йылдарында бөтә ил менән күргән михнәттәрҙе, хәсрәттәрҙе автор ишетеп кенә белмәй, ул үҙе лә ошо ут эсендә ҡоростай сынығып ҡайтҡан кеше. Был романында ул Башҡортостандың Иглин районында ойошторолған 469-сы миномет полкында хеҙмәт иткән яҡташтарҙың яҙмышы тураһында бәйән итә. "Башҡорт полкы" тип йөрөтөлһә лә, егерме ете милләт вәкилен берләштергән был полктың Ватанды азат итеүгә индергән үҙ өлөшө бар. Роман яу ҡырындағы аяуһыҙ һуғыш тураһында ғына булмаҫ, кешеләр яҙмышы, рух көсө, ауырлыҡтарҙы еңер мөхәббәт, өмөт тураһында һөйләр. Тарих төпкөлөндә ҡала барған был ваҡиғаларҙы хәтерҙән сығармау, шундай мәхшәргә ҡабатланырға юл ҡуймау өсөн ошондай әҫәрҙәрҙе уҡырға кәрәк.

94. Рәшит Солтангәрәев "Оло юлдың туҙаны" китап. Был китапта әҙиптең һайланма әҫәрҙәре тупланған. "Осто бөркөт" повесы, "Татар менән башҡорт", "Буш хәбәр", "Ишкәкһеҙ кәмә", "Шкаф" һәм башҡа хикәйәләрен уҡырға мөмкин. Том-том романдар уҡырға ваҡыт таба алмаған, әммә әҙәбиәткә битараф булмаған кешеләр өсөн Рәшит Солтангәрәевтың хикәйәләре менән танышырға тәҡдим итәм. Тормошсан, тәрән мәғәнәле был әҫәрҙәр һәр кемгә үҙенә күрә донъяуи һабаҡ бирерлек.

95. Әсғәт Мирзаһитов "Ғүмер ике килмәй". 1983 йылда баҫылып сыҡҡан был китапта драматургтың "Бәхтегәрәй", "Әсәләр көтәләр улдарын", "Ғүмер ике килмәй" тигән пьесалары тупланған. Йылдар дауамында сәхнәләрҙән төшмәгән, бөтә халыҡ яратып ҡараған спектаклдәрҙе, уларҙы ижад иткән әҙипте һәр башҡорт кешеһе белергә тейеш, тип иҫәпләп, "Башҡорт китабы топ-100+" акцияһы исемлегенә индерергә тәҡдим итәм.

96. Нәжиб Асанбаев "Һайланма әҫәрҙәр". 2011 йылда донъя күргән был йыйынтыҡта Башҡортостандың халыҡ яҙыусыһы, күренекле драматург Нәжиб Асанбаевтың пьесалары, публицистик мәҡәләләре, очерктары, ижади портреттары, иҫтәлектәре тупланған. Уның шәхесе, ижады тураһында ҡараш булдырыу, драма әҫәрҙәрен һәм театр сәнғәтен аңларға өйрәнеү өсөн ошо йыйынтыҡты һәр кем ҡулына алырға тейеш. Башҡорт драматургияһындағы иң сағыу "Ҡыҙыл паша", "Көҙән башҡорто", "Һыу юлы" һәм башҡа пьесалары айырыуса иғтибарға лайыҡ.

"Башҡорт китабы топ-100+" акцияһына ҡушылығыҙ, үҙегеҙ уҡыған башҡорт китаптары/әҫәрҙәре араһынан иң-иңдәрен һайлап, шулар тураһында редакциябыҙға төбәп хаттар яҙығыҙ. Йәки "Бәйләнештә" социаль селтәрендәге "Киске Өфө" гәзите" төркөмөндә махсус булдырылған "Башҡорт китабы топ-100+" акцияһы" тип аталған фекер алышыу битендә "#башкитап" хештегы ҡуйып, үҙ фекерегеҙҙе белдерегеҙ!

Рубриканы Сәриә ҒАРИПОВА алып бара.

КИРЕ СЫҒЫРҒА