Учалы ағинәйҙәре быға тиклем сәхнәгә аҡ йөн ойоҡ һәм галош кейеп сыҡһа, хәҙер инде сарыҡ һәм ҡатаға күсергә булдылар. Шәп бит!

Хәбәрҙар булһағыҙ, республика “Ағинәй” йәмәғәт ойошмаһы ойошторолоу менән башҡорт ҡатын-ҡыҙҙарына “Әйҙәгеҙ, эште үҙебеҙҙең милли кейемдәребеҙҙе тегеп кейеүҙән, һаҡал, селтәр, яға кеүек биҙәүестәребеҙҙе эшләргә өйрәнеүҙән башлайыҡ!” тигән саҡырыу ташланғайны. Ошо һигеҙ йыл эсендә ағинәйҙәребеҙ милли күлдәк, камзул, еләндәр тегеп кейҙе, биҙәүестәр эшләргә өйрәнде, әллә күпме башҡа милли атрибутикаларҙы тергеҙҙе. Әммә... Хәҙер инде ағинәйҙәр алдына тағы бер бурыс ҡуйылды: беҙ йәш быуынға милли кейемдәребеҙҙе һәм биҙәүестәрҙе дөп-дөрөҫ, төп нөсхәләгесә тапшырырға тейешбеҙ. Ошо ниәттән республика “Ағинәй” йәмәғәт ойошмаһы "Хаталар өҫтөндә эш" акцияһы иғлан итте. Ошо акцияға ҡушылып, Учалы ағинәйҙәре башҡорт милли кейемдәрен һәм биҙәүестәрен үҙ асылына, төп нөсхәһенә яраштырыу, ырыуға хас үҙенсәлектәренә тап килтереү, хаталарҙы төҙәтеү менән мәшғүлдәр хәҙер.
Ошо көндәрҙә Учалы районың Бөйҙө ауылында үткән ағинәйҙәр йыйынында ҡатын-ҡыҙҙарыбыҙ галоштан башҡорттоң төп аяҡ кейеме булған сарыҡҡа һәм ҡатаға күсергә саҡырҙы һәм кейеҙҙән, туланан тегелгән ошо аяҡ кейемдәрен демонстрацияланы, тыпырҙатып бейеп тә күрһәтте.
Был йыйында тағы ла бик мөһим бер тема күтәрелде. Ул хаҡта гәзитебеҙҙең 5 октябрҙәге 40-сы һанында уҡығыҙ.