Кешелек донъя календарында XXI быуаттың 21-се йылы тип билдәләнгән ваҡыт даръяһында көн итә әлеге мәлдә. Әммә быға тиклем ул күпме заманалар аша үткәндер - быны хатта ғалим-ғөләмә лә яҡынса ғына билдәләй алмай.

Әммә кешелек тарихы башланған тәү дәүерҙәрҙән үк ул бер-береһенән һис бер айырыла алмаған ике төркөмдән - ир-ат һәм ҡатын-ҡыҙҙарҙан хасил булған. Бөйөк Йыһани Зат, йәғни Аллаһы Тәғәлә Әҙәм үә Һауаны, шулай уҡ уларҙан таралып киткән барса кешеләрҙе ошолай, ике яртынан бер бөтөн булырлыҡ итеп яралтҡан. Улай булмаһа, йәндәребеҙ өсөн бөтмәҫлек энергия сығанағы булған мөхәббәт тигән оло хис-кисереш тә беҙгә ят булыр ине. Ерҙәге тормошто башҡаса күҙ алдына ла килтереп булмай.
Йәнә, үтә боронғо замандарҙа кешелек йәмғиәтенең, цивилизацияның матриархат тип аталған осоро ла булған икән. Йәғни, йәмғиәт менән ҡатын-ҡыҙҙар идара иткән дәүер була ул. Әгәр шулай булмаһа, бәлки, кешелек архаика заманынан үтеп тә сыға алмаҫ ине. Ҡайһы саҡта шулайыраҡ та уйлап ҡуямын: йәмғиәттә генә түгел, дәүләт идаралығында ла ҡатын-ҡыҙҙарыбыҙға бирелә торған урын бермә-бер арта барырға тейештер, тип. Беҙ, ир-ат, уларға башлыса нәфис зат, мөхәббәт объекты, ғаиләләребеҙ усағын һүндермәйенсә тотоп тора алған ир ҡатыны, балаларыбыҙ әсәһе, йә булмаһа тырыштарҙан тырыш һөнәр эйәһе итеп кенә ҡарарға күнегеп киткәнбеҙ. Шуғалыр инде, ҡатын-ҡыҙҙарҙан берәйһе юғары власть органдарына эшкә алына ҡалһа, аптырабыраҡ та, һағайыбыраҡ та ҡарайбыҙ: йәнәһе, ул ҡатын берәй эш күрһәтә алырмы икән? Ә бит сит илдәрҙә, хатта Европа һәм Америкала ғына түгел, Азия илдәрендә лә юғары власть даирәләрендә дан ҡаҙанған лидер ҡатын-ҡыҙҙар күбәйгәндән-күбәйә бара. Уйлауымса, киләсәктә Рәсәйҙә лә ҡатын-ҡыҙ Ил президенты вазифаһына һайланған хәлдә күп проблемаларыбыҙ тиҙерәк тә, еңелерәк тә хәл ителер ине кеүек миңә. Ҡатын-ҡыҙҙарыбыҙ мәктәп тупһаһынан алып вузға тиклем, үҙ йортонда ла, профессиональ өлкәлә лә күп ирҙәрҙән алдымыраҡ икәнен дә күреп-белеп торабыҙ ҙа баһа! Шулай булғас, мин яңы заманда өр-яңы бер оран-лозунгты барса илгә иғлан итер инем: "Алға, һөйөклө гүзәл заттар! Һеҙ ала алмаған бейеклектәр юҡ ул!"

Арыҫлан ТАЙМАСОВ.

КИРЕ СЫҒЫРҒА