Ошо көндәрҙә баш ҡалала Башҡортостандың Мәғарифты үҫтереү институтында "Тәрбиә һәм белем биреү башҡорт телендә алып барылған иң яҡшы мәктәпкәсә белем биреү учреждениеһы" төбәк-ара конкурсына йомғаҡ яһалды.

Балалар баҡсалары араһындағы был ярыш беренсе тапҡыр үткәрелә һәм унда бөтәһе 55 учреждение һынау тотҡан, шул иҫәптән Силәбе һәм Һамар өлкәләренән дә ҡатнашҡандар. Конкурс "Башҡортостан Республикаһы халыҡтары телдәрен һәм дәүләт телдәрен һаҡлау һәм үҫтереү" дәүләт программаһын тормошҡа ашырыу сиктәрендә февраль башынан март аҙағына тиклем дистанцияла ойошторолған. Ярыш ике этаптан торған, һөҙөмтәлә иң яҡшы 20 ауыл, 10 ҡала мәктәпкәсә белем биреү учреждениеһы билдәләнгән. Улар араһында юғары эш һөҙөмтәһе күрһәткән Хәйбулла районы Аҡъяр ауылының "Шатлыҡ" 3-сө балалар баҡсаһы (мөдире Зәбирә Бикбаева), Өфө ҡалаһының 308-се Башҡорт балалар баҡсаһы (мөдире Фәйрүзә Мусабирова) абсолют еңеүселәр тип табылған.
Еңеүселәрҙе тәбрикләрҙән алда БР Мәғариф министрлығының Милли мәғариф идаралығы етәксеһе Булат Зинуров, бүлек мөдире Розалия Сафиуллина, БР Мәғарифты үҫтереү институты хеҙмәткәрҙәре, М. Аҡмулла исемендәге БДПУ педагогтары һәм балалар баҡсалары хеҙмәткәрҙәре ҡатнашлығында "Башҡорт теле - балаларға" тигән түңәрәк ҡор ойошторолдо. Уның барышында мәктәпкәсә белем биреү учреждениелары өсөн башҡорт телле йәш кадрҙар әҙерләү, тәрбиәселәргә квалификация яңыртыу, методик ярҙам күрһәтеү кеүек актуаль мәсьәләләр ҡаралды. Әйткәндәй, тиҙҙән балалар баҡсаһында башҡорт телендә белем биреү өсөн "Бала саҡ" һәм башҡорт телен өйрәтеү маҡсатында "Шатлыҡ" программалары нәшер ителәсәк. Ә бына М. Аҡмулла исемендәге БДПУ-ла буласаҡ тәрбиәселәрҙе әҙерләгән яңы уҡытыу йүнәлеше асыла. "Башҡорт балалар баҡсаһында бик матур эш һөҙөмтәләренә өлгәшкәндәргә республика кимәлендә тәжрибәһен күрһәтеү өсөн ҡулай конкурс барлыҡҡа килеүенә шатландыҡ. Мәктәп өлкәһендәге кеүек грант программалары ла булдырылһын ине. Беҙҙең балалар баҡсаһында 13-төң 6-һы - башҡорт төркөмдәре. "Башҡорт йәйләүе" ҡоролмалар төҙөү үҙәгебеҙ бар, бында 5 йәштән алып балалар бик теләп шөғөлләнә һәм башҡорт халҡының кәсептәренә лә өйрәнә. Атай-олатайҙар ярҙамы менән ете төр умарта өлгөһө, ауылдың эшҡыуарҙары, балта оҫтаһы Рәмил Билалов ике төр тирмә макеттарын эшләп бирҙе. Балалар схемаларға ҡарап, шул тирмәләрҙе үҙҙәре ҡороп ҡарай", - ти Аҡъяр ауылының "Шатлыҡ" 3-сө балалар баҡсаһы мөдире Зәбирә Бикбаева.

Камила ҒӘЛИЕВА.

КИРЕ СЫҒЫРҒА