Ошо көндәрҙә Мәскәүҙә "Йыл ғаиләһе" Бөтә Рәсәй конкурсына йомғаҡ яһалды. Был конкурсты Рәсәйҙең Хеҙмәт һәм социаль яҡлау министрлығы менән берлектә Ауыр тормош хәлендә ҡалған балаларға ярҙам фонды ойоштора. Девизы: "Минең ғаиләм - минең Рәсәйем".

Башҡортостандан конкурста биш номинацияла биш ғаилә ҡатнашты: "Алтын ғаилә" номинацияһында Мәләүез районынан Мәхмүтовтар, "Күп балалы ғаилә" - Краснокама районынан Дербеневтар, "Йәш ғаилә" - Салауат районынан Хәйрисламовтар, "Ауыл ғаиләһе" - Бишбүләк районынан Сираевтар һәм "Ғаилә - традицияларҙы һаҡлаусы" номинацияһында Өфө районынан Мәхмүтовтар.
Конкурстың Бөтә Рәсәй этабында илдең 85 төбәгенән 366 ғаилә ярышты, 85 ғаилә еңеү яуланы. Улар араһында Салауат районынан Хәйрисламовтар ҙа бар. Ирина һәм Айбулат Хәйрисламовтар 10 йыл элек ғаилә ҡорған. Улар икеһе лә эш һөйөүсән, маҡсатҡа ынтылыусан. Ғаилә башлығы үҙ эшен асҡан, Ирина Хәйрисламова - рус теле һәм әҙәбиәте уҡытыусыһы, педагогтар араһында ойошторолған халыҡ-ара, бөтә Рәсәй, республика конкурстары еңеүсеһе. Ғаиләлә ике бала тәрбиәләнә, улар ҙа, ата-әсәһе кеүек, бәләкәй саҡтан райондың йәмәғәт тормошонда әүҙем ҡатнаша.
Башҡортостан Хеҙмәт министрлығынан хәбәр итеүҙәренсә, "Йыл ғаиләһе" Бөтә Рәсәй конкурсының йомғаҡлау сараһы ноябрҙә ойошторола. Конкурс йомғаҡтары буйынса Милли китап-йылъяҙма сығарыла. Ул ике баҫманы үҙ эсенә ала: тәүгеһендә - ғаиләләрҙең тарихтары, икенсеһендә Бөтә Рәсәй конкурсында ҡатнашыусылар тураһында мәғлүмәт урынлаштырыла.

КИРЕ СЫҒЫРҒА