М. Ғафури исемендәге Башҡорт дәүләт академия драма театры сәхнәһендә Салауат дәүләт башҡорт драма театры коллективы Сәрүәр Суринаның "Абау, димсе килә!" музыкаль комедияһын күрһәтте. Спектаклде сәхнәгә режиссер Зиннур Сөләймәнов, бейеүҙәрҙе хореограф Сулпан Асҡарова ҡуйған. Театрҙың директоры - Башҡортостандың атҡаҙанған артисы Айбулат Ҡотошов.

Ике өлөштән торған, өс сәғәткә һуҙылған йырлы-бейеүле, кәмитле тарих бер тынала үтеп тә китте. Көлөп хәл бөттө. "Ысын спектакль театрҙан өйөңә ҡайтҡас башлана", тигәйне бер саҡ Азат Йыһаншин. Мин дә өйгә ҡайтҡас, театрҙың тулы коллективы ярҙамында ҡуйылған сәхнә тарихының бигерәк тә тамашасыны туҡтауһыҙ шарҡылдап көлөргә мәжбүр иткән өлөштәрен иҫләп, өйҙәгеләргә һөйләргә теләһәм дә, килеп сыҡманы.
Кем берәү әйтмешләй, "көлә килә, артынан һөрә килә" икән дә! Әле килеп, спектакль геройҙарының ошондай көлкө хәлгә ҡалыуының сәбәптәре хаҡында уйланам. Дөрөҫөн әйткәндә, спектакль хәҙерге замандың иң ауыр проблемаһы һаналған яңғыҙлыҡ, ғаилә трагедиялары хаҡында. Спектакль башында барыһы ла яңғыҙ, ирҙәр Себерҙә ғаиләләрен аҫрау өсөн бил бөгә, ҡатындар берҙе биш итеү маҡсатында ауылда ирҙәр эшен башҡара, ҡул эштәре менән мәшғүл.
Барыһы ла бәхетһеҙ. Шундай саҡта ауылдың иң прогрессив өлөшө һаналған ағинәйҙәр бар инициативаны үҙ өҫтөнә алып, барыһын да башлы-күҙле итеүгә өлгәшә. (Ағинәйҙәрҙең үҙ-ара мөнәсәбәтендә лә проблемалар юҡ түгел). Хатта ялға тип ҡайтҡан Себер зимагурҙары ла спектакль аҙағында ауылдарында тороп ҡалып, үҙ эштәрен асырға ҡарар итә. Һуңғы сәхнәлә барыһы ла парлы. Барыһы ла бәхетле!
Әлбиттә, бөгөнгө ауылдың ошондай ҡотһоҙ ысынбарлығын башҡа жанрҙарҙа ла күрһәтергә мөмкин булыр ине, әйтәйек, драмала, трагедияла. Әммә автор һәм барлыҡ ижади коллектив ошо юлды, йәғни күҙ йәштәре аша көлөүҙе һайлаған һәм яңылышмаған, маҡсатына өлгәшкән. Был йәһәттән комедияға төрөлгән Шекспир трагедияларын иҫкә төшөрөү ҙә урынлы булыр ине.

ӘЙТКӘНДӘЙ... Салауат дәүләт башҡорт драма театрының яңы директоры Айбулат Ҡотошовтоң Сибай концерт-театры берекмәһендә һынау үткән бер төптән тотоноу алымын бында ла бик уңышлы дауам итеүе маҡтауға лайыҡ. Әйткәнемсә, спектакль башында театрҙың барлыҡ составы сәхнәлә, барыһы ла бәхетһеҙ! Спектакль аҙағында - барыһы ла парлы һәм бәхетле!

Әмир ҒҮМӘРОВ.

КИРЕ СЫҒЫРҒА