Баймаҡ районында эре баш малға йоғошло нодуляр дерматит сире янай. Унда карантин иғлан ителде.

Район хакимиәте башлығы Фәнис Әминев социаль селтәрҙәге диуарында хәбәр итеүенсә, эре баш малдарҙың төйөрлө дерматит менән зарарланыу билдәләре Моҡас ауыл хакимиәтенең 1-се Төркмән ауылында табылған. Тикшереү үткәрелеп, өлгөләр алғандан һуң 17 шәхси ярҙамсы хужалыҡта ошо сир менән зыянланған 124 баш һәм ике крәҫтиән-фермер хужалығында 76 баш мал булыуы асыҡланған. Малдарҙың бөтәһе лә юҡ ителде. "Сир сығанағы табылған ауыл халҡы менән сход үткәрелде, белгестәр кешеләрҙе ҡыҙыҡһындырған бөтөн һорауҙарға ла яуаптар бирҙе. Халыҡтың был проблема айҡанлы борсолоуҙары аңлашыла: улар мал көсө менән донъя көтә. Сир сығанағын сикләү маҡсатында тораҡ пункты тирәләй карантин постары булдырылды. Әлегә карантин 3-4 аҙнаға тиклем индерелде, хәлде даими контролдә тотасаҡбыҙ. 15 км радиустағы 8 ауылдағы барлыҡ малдарға ла прививка эшләнә. Әлбиттә, 2021 йыл район өсөн бик ҡатмарлы килде: саранча, ебәк күбәләге баҫып алғайны, унан ҡоролоҡҡа, янғындарға ҡаршы көрәштек. Урындағы халыҡ менән был проблеманы ла еңеп сығырбыҙ, тип уйлайым", - тип һөйләне "Башинформ" агентлығына район хакимиәте башлығының беренсе урынбаҫары Азат Шәрипов.
Белгестәр бәйән итеүенсә, был сирҙең тышҡы билдәләре шундай: биҙгәк тотоу, малдарҙың ябығыуы һәм продуктлылығы кәмеү, лимфа системаһының зарарланыуы, тире аҫты күҙәнәклеге һәм эске органдарҙың шешенеүе, тирелә төйөрсәләр барлыҡҡа килеү, күҙҙәр, тын һәм аш һеңдереү юлдарының лайлаһы зарарланыу. Был сирҙән малдарҙың үлеү кимәле 10 проценттан артмаһа ла, ҡабатлап йоғоу хәүефе була ҡалһа, хәл ҡатмарлаша һәм үлем осраҡтары ла арта.
Район башлығы Баймаҡ районы халҡына мөрәжәғәт итеп, түбәндәге ҡағиҙәләрҙең үтәлеүен һораны: Дәүләт ветеринария хеҙмәтенең Баймаҡ бүлексәһе менән килешмәйенсә тороп, сит өлкәләр һәм төбәктәрҙән малдар килтермәҫкә; мал һатып алыу йә булмаһа, үрсем алыу, мал һуйыу һәм һатыу, бер нисә баш мал үлгән осраҡтар хаҡында дәүләт ветеринария хеҙмәтенә хәбәр итергә; ветеринария белгестәренә уларҙың талабы буйынса малдарҙы ҡарарға, тикшерергә һәм диагностика ҡуйырға булышлыҡ итергә; малдарҙы һуйырҙан алда һәм аҙаҡ ветеринария белгестәренә күрһәтергә. Эре баш малдарҙа йоғошло нодуляр дерматит билдәләре асыҡланыу менән был хаҡта Баймаҡтағы дәүләт ветеринария хеҙмәтенә ошо телефондар буйынса шылтыратырға кәрәк: 8 (34751) 3-33-21; 8 (34751) 3-32-37.

Азат ҒИЗЗӘТУЛЛИН.
"Киске Өфө" гәзите, №49, 2021 йыл

КИРЕ СЫҒЫРҒА