Өфөнөң "Арт-квадрат" киңлегендә үҫмерҙәр өсөн "Ышан" мистик сериалының исем туйы үтте. Уның ҡышҡы каникулда Башҡортостан юлдаш телевидениеһында күрһәтелгән ете серияһын тамашасылар бик ҡыҙыҡһынып ҡараған.

Сериал хәҙерге үҫмерҙәрҙең проблемаларын күтәрә. Ете серия - башҡорт халыҡ легендаһындағы ете ҡыҙҙың бәләгә тарыған үҫмерҙәргә нисек ярҙам итеүе тураһында ете тарих. "Ышан" сериалының социаль әһәмиәте баһалап бөткөһөҙ. Проект балаларҙың һәм үҫмерҙәрҙең туған телгә, мәҙәниәткә ҡыҙыҡһыныуын арттырыу, үҫеп килгән быуындың проблемаларына ата-әсәләр һәм йәмәғәтселек иғтибарын йәлеп итеү маҡсаттарын алған. "Ышан" сериалы балаларҙы һәм үҫмерҙәрҙе үҙ көсөнә, яҡындарына ышанырға саҡырыуы менән ҡиммәтле, - ти мәҙәниәт министры Әминә Шафиҡова. - Был иһә "Тамыр" телеканалының бындай форматтағы икенсе әһәмиәтле проекты. Тәүге "Бирешмә!" сериалында каналдың ижади командаһы йәш тамашасыларҙы бирешмәҫкә саҡырҙы. Яңы фильмдың төп идеяһы ла ошо. Ижади төркөмгә, актерҙарға, балаларға рәхмәт! Артабан да "Тамыр" ошондай кәрәкле сериалдар төшөрһөн тип теләйем".
Шулай уҡ РФ Дәүләт Думаһы депутаты Зариф Байғусҡаров, мәғариф һәм фән министры урынбаҫары Әлфиә Ғәлиева, Бөтөн донъя башҡорттары ҡоролтайының Башҡарма комитеты рәйесе Юлдаш Йосопов, Граждандар йәмғиәтенә булышлыҡ итеү фонды директоры Люциә Юлыева, "Ағиҙел" журналының баш мөхәррире Мөнир Ҡунафин, "Башҡортостан" телерадиокомпанияһы директоры Рөстәм Зәрәфетдинов та "Тамыр" командаһына ошондай мөһим һәм көнүҙәк проект өсөн рәхмәттәрен белдерҙе. "Тамыр" телеканалында эшләгән коллегаларымдың уңыштарына ныҡ һөйөнәм. Ҡыҙғанысҡа ҡаршы, хәҙерге заманда балалар өсөн сифатлы кино контенты аҙ. Әле беҙҙә телевизион кинематограф та үҫешә. Республикала милли Голливуд булдырырлыҡ ҡеүәт бар. Күберәк төшөрөргә, күберәк ижад итергә кәрәк", - тине яңы сериалды юғары баһалап билдәле кинорежиссер Булат Йосопов.
Ошо көндәрҙә "Ышан"дың ете серияһы ла социаль селтәргә һалынасаҡ.

"Киске Өфө" гәзите, №3, 2022 йыл

КИРЕ СЫҒЫРҒА