Баш ҡаланың "Арт-Квадрат"ында йәштәрҙең "JOB SPACE" карьера форумы үтте. Ул бер командаға 500-ҙән ашыу буласаҡ белгесте, эш башлап тороусы эшҡыуарҙы, эшсе йәштәрҙе йыйҙы.

Сара өс йүнәлештә барҙы: "Карьера" - Өфөнөң алдынғы компанияларында эш эҙләү һәм тәжрибәләрен шунда һынап ҡарау хыялы менән яныусылар; "Бизнес" - эш башлаусы һәм үҙ эшен алып барыусы эшҡыуарҙар; "Трудмол" - баш ҡала йәштәрен эшкә урынлаштырыу мөмкинлеге. Форум барышында хеҙмәт баҙары, эшлекле уйындар, консультациялар, лекциялар, йыйылыштар һәм башҡа саралар ойошторолдо. Фекер алышыу майҙансыҡтарының береһендә "Өфө - йәштәр өсөн һәм йәштәр ҡалаһы" темаһы буйынса Өфө ҡалаһы хакимиәте башлығы Ратмир Мәүлиев менән төрлө предприятиелар, учреждениеларҙан вәкил булып килгән алдынғы эшсе йәштәр араһында "Һорау-яуап" форматында һөйләшеү барҙы. Йәштәрҙе үҙҙәрен бөгөн ҡыҙыҡһындырған мәсьәләләр борсоно, ә мэр үҙенең тәжрибәләре менән бүлеште, баш ҡаланы киләсәктә ниндәй үҙгәрештәр көтөүе тураһында һөйләне.
- Йәштәрҙең һәр нәмәгә талабы юғары һәм улар уны үҙҙәре йәшәгән урында күтәрә, сөнки беҙҙең тирә-яҡ мөхитебеҙ ҙур әһәмиәткә эйә. Был йәһәттән, йәмәғәт транспортын үҫтереү булһынмы ул, ҡаланы төҙөкләндереүме һ.б. бурыстарыбыҙ бик ҙур. Быйыл ғына 10 парк төҙөлә һәм яңыртыла. Өфөнөң 450 йыллығы сиктәрендә баш ҡалала уның визит карточкаһына әүереләсәк яңы объекттар барлыҡҡа киләсәк, - тип белдерҙе Ратмир Мәүлиев. - Өҫтәмә белем биреүгә килгәндә, әлеге ваҡытта бик күп мөмкинлектәр бар. Беҙ, үҙ сиратыбыҙҙа, йәштәр үҙҙәрен күрһәтә алһын һәм киләсәктә ҡуллана алырлыҡ һөнәрҙәргә эйә булһын өсөн яңы майҙансыҡтар булдырырға тейешбеҙ. Әммә донъя шул тиклем тиҙ үҙгәрә, шуға бер урында тормаҫҡа, һығылмалы булырға, яңы белем алып һәм тәжрибә туплап, донъя менән бергә үҙгәрергә кәрәк. Был йәһәттән дәүләт бик күп программалар булдыра. Иң мөһиме - ҡул һелтәмәҫкә һәм ныҡышмал булырға кәрәк, шул саҡта барыһы ла тормошҡа ашасаҡ.

"Киске Өфө" гәзите, №17, 2022 йыл

КИРЕ СЫҒЫРҒА