Фотокор № 1 (йәки "Фотокор-1", "Фотокор") 1930 - 1941 йылдарҙа сығарылған пластиналы бөкләнмәле (складной) фотоаппарат. 11 йыл эсендә 1 миллиондан ашыу ошондай фотоаппарат эшләп сығарыла.

"Фотокор" камераһының үҙенсәлеге - объективын горизонталь һәм вертикаль йүнәлештә күсереп йөрөтөү мөмкинлеге. Камераның киҫкенлеген көйләү корпустың артҡы диуарындағы тоноҡ быяла һәм арауыҡ шкалаһы буйынса башҡарыла. Фотоматериал өсөн 9*12 сантимертлыҡ быяла фотопластинкалар ҡулланылған. Пластинкалар шыуҙырмалы, бер һәм ике яҡлы металл кассеталар эсендә урынлашҡан булған. Шулай уҡ фотоаппарат камераны горизонталь рәүештә ҡуйыуҙы еңеләйтеү өсөн өҫтәмә рәүештә фильмпак-адаптер һәм шыйыҡсалы кимәл менән йыһазландырылған.
Фотоаппараттың габариты йыйылған килеш 106*115*64 мм, ауырлығы 1,15 кг була. Уның корпусы ҡара төҫтәге тирене алмаштырыусы материал менән тышланған, метал әйберҙәре хромланған һәм никелләнгән. Ҡулланыуҙа уңайлы булһын өсөн фотоаппарат корпусының өҫкө өлөшөндә "Фотокор № 1" яҙыулы ҡара күндән эшләнгән тотҡа ҡуйылған. Шулай уҡ ҡаты күнле төргәк менән комплектланған. "Фотокор" фотоаппараты Бөйөк Ватан һуғышы осоро фотохроникаларын төшөрөүҙә киң ҡулланылған.


Фотолағы фотоаппарат БР Милли музейы филиалы - Дүртөйлө тарихи-тыуған яҡты өйрәнеү музейы фондында һаҡлана, ДИКМ ОФ 2159 иҫәпләү номерына эйә.

"Киске Өфө" гәзите, №2, 2023 йыл

КИРЕ СЫҒЫРҒА