Башҡаларҙан айырылып торһон өсөн Аллаһы Тәғәлә һәр бер халыҡҡа тел, ғөрөф-ғәҙәттәр, йолалар, хатта кейем биргән, тиелә бер башҡорт риүәйәтендә.

Милли костюм - мөһим сығанаҡ, ул халҡыбыҙҙың матурлыҡты нисек тәрән аңлауын сағылдырып тора. Дәүерҙәр үҙгәреп торһа ла, башҡорт бер ҡасан да үҙ асылынан ситкә китмәгән. Бөгөн дә халҡыбыҙҙың сәнғәт элементтарын ҡулланабыҙ,
йолаларыбыҙҙы тотоп йәшәйбеҙ, уларҙы балаларыбыҙға өйрәтәбеҙ.
Һуңғы йылдарҙа иманлы, айыҡлыҡ яҡлы йәштәрҙең, тәүге ғаилә байрамдарын - никах туйҙарын милли стилдә уҙғарырға тырышыуы ҡыуандыра. Милли күлдәктәр бындай байрам тантанаһына айырыуса йәм, зауыҡ, сағыулыҡ өҫтәй.
Бөрйән районында яңыраҡ ошондай матур туй тантанаһы үткән. Ғаилә ҡорған йәштәр - Аҫҡар ҡыҙы Йәнгүзәл һәм Нәби егете Ғәзинур Һатыбаловтар никахтарын теркәү тантанаһын Аҫҡарҙа саф һауала уҙғарған. Килен булып төшкән ауылында ҡыҙға Нәби ағинәйҙәре йолаға тура килтереп матур итеп һыу юлы ла күрһәткән. Башҡорт кейемендә тәүге ғаилә байрамдарын билдәләгән йәштәрҙең ғүмерҙәре лә шулай матур, сағыу булһын тип теләйбеҙ.

Сулпан ҒАРИПОВА.
"Киске Өфө" гәзите, №31, 2023 йыл

КИРЕ СЫҒЫРҒА