Ҡағыҙға баҫылған гәзит күп быуаттарҙы үҙ эсенә алған тарихҡа эйә. Нәҡ улар ярҙамында кеше яңылыҡтарҙы белгән һәм башҡа мәғлүмәт менән танышҡан. Бөгөнгө көндә лә, тормошобоҙҙа электрон сығанаҡтар күп урынды алһа ла, аҡҡа ҡара менән яҙылған гәзит һәм журналдар көнүҙәклеген юғалтмай. Республикабыҙҙа ла бихисап ваҡытлы матбуғат баҫмалары донъя күрә. Уларҙың һәр ҡайһыныһы үҙ урынында кәрәкле һәм һәр береһе үҙ уҡыусыһын күптән тапҡан. Ошо күптөрлөлөк араһында ла башҡаларҙан айырылып торған гәзит бар - ул минең яратҡан баҫмам "Киске Өфө".

Күпселек ваҡытлы матбуғат берәмектәре актуаль мәғлүмәтте киң йәмәғәтселеккә еткереүсе ролендә генә йәшәй. Ә "Киске Өфө" иһә теге йәки был ваҡиға тураһында һөйләп кенә ҡалмай, ә аналитик мәҡәлә-ләргә ҙур урын бүлә. Ошо рәүешле ул гәзит уҡыусыла бөгөнгө көнүҙәк теманың тарихта тотасаҡ урыны тураһында фекер йөрөтөргә этәргес бирә. Күп ваҡыт беҙ илдә, үҙебеҙҙең республикала барған хәл-ваҡиғаларҙы "Киске Өфө"лә нисек баһалауҙары, анализлауҙары аша ҡабул итергә өйрәнгәнбеҙ.
Гәзит үҙ уҡыусылары менән аралашыуға асыҡ, һәр саҡ ҡырҡыу мәсьәләләрҙе күтә-рә, уҡыусыларҙың төрлө һорауына төплө яуаптар бирә, уҡыусылар араһында төрлө конкурстар, һорау алыуҙар, фекер алышыуҙар уҙғара.
"Киске Өфө" - ижтимағи-сәйәси-мәҙәни гәзит булараҡ теркәлгән баҫма. Әлеге мәлгә тиклем гәзит был өс өлкә араһындағы тигеҙлекте яҡшы һаҡлап килде һәм үҙен уҡыған төрлө ҡатлам кешеләренә, йәштәргә һәм ололарға ҡыҙыҡлы булып ҡала алды. Артабан да шулай уҡ дауам итеүенә шигем юҡ. Ниндәй баҫмаға ла, тәү сиратта, үҙ уҡыусыһының ышанысын юғалтмау мөһим. Уны яулауы ғына түгел, ә тотоп ҡала белеү ҙә ҙур көс талап итә. "Киске Өфө" гәзите редакцияһы был мәсьәләне уңышлы хәл итә.
Баҫма беҙҙең республика тормошонда мөһим, конструктив роль уйнай, ул йәмғиәтте берләштереүсе, халыҡты дәртлән-дереүсе, яңы идеялар менән бүлешеүсе гәзит. Тағы ла оҙаҡ йылдар уның беҙҙең менән булыуын теләп ҡалам.

Тимербикә СӘЛИМОВА.
"Киске Өфө" гәзите, №41, 2023 йыл

КИРЕ СЫҒЫРҒА