Салауат дәүләт башҡорт драма театрында икеләтә байрам - башҡорт әҙәбиәте классигы Мостай Кәримдең "Ярлыҡау" повесы буйынса ҡуйылған спектакленең премьераһы һәм яңы 91-се театр миҙгелен асыу тантанаһы үтте.

"Берҙәм Рәсәй" партияһының "Кесе Ватан мәҙәниәте" проекты ярҙамында режиссер Илсур Ҡаҙаҡбаев тарафынан сәхнәләштерелгән спектакль премьераһына Үзбәкстан Республикаһы Фәндәр Академияһының үзбәк теле, әҙәбиәте һәм фольклоры институты доценты Гөлноз Сатторова кеүек ҡунаҡтар, журналистар, яҙыусылар, шулай уҡ театр тәнҡитселәре лә килгәйне. "Мин Салауатҡа, һеҙҙең театрығыҙҙың "Ярлыҡау" спектакле премьераһына ҙур тулҡынланыу менән килдем! - тине үҙенең сәләмләү һүҙендә авторҙың ҡыҙы, "Мостай Кәрим исемендәге фонд" етәксеһе Әлфиә Мостай ҡыҙы Кәримова. - Был әҫәр һуғыш тураһында түгел, ә тормоштоң фажиғәле минуттарында һайлау ауырлығы алдында ҡалыу тураһында. Был спектаклде уйнау бик ауыр, ихласлыҡ кәрәк. Рәхмәт, Илсур Юлай улына, ул Мостайҙың ни әйтергә теләгәнен аңлаған. Рәссамдың, хореографтың эше, актерҙарҙың уйнауы ла оҡшаны. Минеңсә, был спектакль "Ярлыҡау"ҙың иң яҡшы ҡуйылыштарының береһе. Рәхмәт һеҙгә!"
Спектаклдән һуң театрҙың баш режиссеры Лиана Ниғмәтуллина артистарға һәм ҡуйыусы төркөмгә матур спектакль өсөн рәхмәт һүҙҙәрен еткерҙе. Артабан ул театрҙың яңы миҙгел асылыу алдынан яулаған уңыштары һәм наградалары тураһында һөйләне. Билдәләнеүенсә, быйыл Салауат театры А.Житковскийҙың "Һырғалаҡ" спектакле менән Екатеринбургта XVI "Коляда - Plays" халыҡ-ара заманса драматургия театр фестивалендә ҡатнашҡан. Башҡортостан Республикаһының халыҡ артисы Яҡуп Шәрипов Озод роле өсөн "Икенсе пландағы иң яҡшы ир-егет роле" номинацияһына лайыҡ булған. Шулай уҡ күптән түгел театр А.Островскийҙың "На всякого мудреца довольно простоты" пьесаһы буйынса "Глумов" спектакле менән Сыктывкар ҡалаһында Үткән V Төньяҡ театр фестивалендә ҡатнаша һәм ике номинацияла еңеү яулай: "Иң яҡшы спектакль өсөн" - гран-при һәм Глумов ролендәге Башҡортостан Республикаһының атҡаҙанған артисы Рафаэль Ғәйнуллинға - "Иң яҡшы ир-егет роле". Театр директоры, Башҡортостандың атҡаҙанған артисы Айбулат Ҡотошов билдәләүенсә, яңы, 91-се театр миҙгеле ҡыҙыҡлы тамашаларға бай булырға вәғәҙәләй: сәхнәнең алдынғы актерҙарының ижад кисәләре, сағыу спектаклдәр ҡуйыласаҡ, фестивалдәрҙә ҡатнашыу, тематик концерттар, Башҡортостан Республикаһы һәм унан ситтә гастролдәр планлаштырыла.

Динә БӘШИРОВА.
"Киске Өфө" гәзите, №43, 2023 йыл

КИРЕ СЫҒЫРҒА