Өфөлә башҡорт гимназиялары уҡыусылары өсөн "Аулаҡ өй. Өләсәйҙәр менән осрашыу" проектын ойошторалар. Саралар "Бишбармаҡ" студияһында үтә. Проекттың маҡсаты- өлкән быуындың йәштәргә башҡорт халҡының мәҙәни кодын тапшырыу.

Өфөнөң башҡорт гимназияларынан 750 уҡыусы башҡорт халҡының милли ризыҡтарын әҙерләү буйынса оҫталыҡ дәрестәрендә ҡатнаша, милли йолалар, костюмдар, уйындар, көнкүреш менән таныша. Проектты Башҡортостан Башлығы гранттары фонды ярҙамында БашТурСоюз ойоштора .Оҫталыҡ дәрестәрен "Селтәр" студияһында ҡатнашыусы әүҙем пенсионер ҡатын-ҡыҙҙар һәм Башҡортостандың артистар берләшмәһе вәкилдәре үткәрә. Саралар башҡорт телендә бара.
"Күп балаларҙың ауылда өләсәйҙәре юҡ, милли традицияларҙы, фольклорҙы белеүселәр, йәнле башҡорт телендә һөйләшеүселәр менән аралар өҙөлә, - ти проектты башлаусы "Бишбармаҡ" студияһына нигеҙ һалыусы Венера Бикҡужина. - Проект ошо бушлыҡты тултырырға тейеш. Өлкән быуын вәкилдәренең һәм уҡыусыларҙың бергәләп сәй эсеп, уйын формаһында үткән сараларҙан һуң балаларҙың милли мәҙәниәткә һәм телгә ҡыҙыҡһыныуы артыр тип көтәбеҙ".
Сара бер нисә өлөштән тора. Башта балалар ашнаҡсы менән бергә ваҡ бәлеш бешерә. Тирмә нисек ҡоролоуы һәм башҡорт кейеме элементтарының нимә аңлатҡаны тураһында һөйләшәләр. Программаның төп өлөшө - милли йолаларҙы, йәғни "Килен һөйөү" йәки яңы тыуған сабыйға исем ҡушыу йолаларын сәхнәләштереү. Һуңынан балалар алып барыусылар менән бергә "Йәшел яулыҡ", "Үгеҙ йөҙөк кемдә" уйындарын уйнай. Осрашыу эремсек, ҡорот, талҡан ашап, бергәләп сәй эсеү менән тамамлана. Унда ҡатнашҡан һәр бала иҫтәлекле бүләк ала.

"Киске Өфө" гәзите, №7, 2024 йыл

КИРЕ СЫҒЫРҒА