Өфөлә БДМУ клиникаһының роботлаштырылған хирургияһы үҙәгендә уникаль операция яһалды.

Хирургтар робот ярҙамында тубыҡ быуынына протез ҡуйҙы. Видео буйынса эш барышын юғары уҡыу йорто студенттары күҙәтте. Медицина учреждениеһы матбуғат хеҙмәте мәғлүмәттәре буйынса, операцияны алтмыш йәштән өлкән ҡатынға яһағандар. Тубыҡҡа операция бер сәғәт кенә дауам итә. Элек хирургтар һөйәкте титан ярҙамында ҡырҡып алған, ә бөгөн барыһы ла лазер ярҙамында башҡарыла. "Операция бүлмәһендә хирург бер үҙе эшләй, уға ассистенттар бригадаһы кәрәкмәй, барыһын да робот эшләй. Бында туҡыма алып ташлана, ә яра таҙа ҡала. Имплант теүәл урынлаштырыла, өҙлөгөү хәүефе бик аҙ", - тип һөйләне БДМУ-ның травматология һәм ортопедия кафедраһы мөдире, медицина фәндәре докторы, профессор Булат Минасов. Ординаторҙар роботлаштырылған операция барышын тура эфирҙа ҡараны, ҡыҙыҡһындырған һорауҙарын бирҙе. "Быға тиклем Башҡортостандағы коллегалар менән Мәскәүҙә эшләнек. Хәҙер беҙ бында яңы шарттарҙа техника ҡуйырға ярҙам итәбеҙ. Роботтың өҫтөнлөгө - оперцияны интернет аша ла эшләргә мөмкин", - тип билдәләне Сеченов университетының травматология, ортопедия һәм быуын ауырыуҙары кафедраһы профессоры Андрей Грицюк.
БДМУ клиникаһының роботлаштырылған хирургияһы үҙәге бөгөн Волга буйы федераль округында берҙән-бер иҫәпләнә. Белгестәр әйтеүенсә, ул йылдан-йыл үҫешә. Заманса технологиялар ярҙамында эш тәжрибәһе лә яйға һалына. "Робот ярҙамында операция яһау технологияһы артабан да үҫешәсәк. Донъяның күп илдәрендә бындай роботтар тәүлек әйләнәһенә эшләй. Хирург арырға, ауырырға мөмкин, робот кеше факторын һәм хаталарын тулыһынса юҡҡа сығара. Урология, онкология, ҡан тамырҙары хирургияһындағы кеүек, робот хирургияһы тиҙҙән ортопедияла төп хирургияға әйләнәсәк", - тип аңлатма бирҙе БДМУ ректоры, профессор Валентин Павлов.

"Киске Өфө" гәзите, №8, 2024 йыл

КИРЕ СЫҒЫРҒА