Байлығы булған һәр мосолманға фитыр саҙаҡаһы биреү вәжиб. Фитыр саҙаҡаһы ла, зәкәт шикелле үк, йылға бер мәртәбә бирелә.

Фитыр саҙаҡаһы ураҙаларҙағы кәмселектәрҙе бөтөрөү өсөн бирелә, сөнки ай буйы ураҙа тотҡанда һәр мосолман барыбер бәләкәс кенә булһа ла гонаһ ҡыла. Шуға ла кәффәрәт, таҙарыныу өсөн, гонаһтарҙы бөтөрөү өсөн ошо саҙаҡаны бирәбеҙ. Хәлле кеше был ғәмәлде мотлаҡ үтәй, хатта донъя ҡуйғас та уның вариҫтары уны гүр саҙаҡаһы итеп бирә. Ярлы кеше был саҙаҡаны бирмәй, киреһенсә, уға биреү дөрөҫ була. Балаларҙың фитыры тураһында ата-әсәһе хәстәрләргә тейеш. Хатта ғәйет намаҙынан алда тыуған йәш бала өсөн дә бирелә фитыр саҙаҡаһы.
Фитыр саҙаҡаһы өсөн урта хәлле кешегә йән башына 4 ҡаҙаҡ бойҙай йәки 8 ҡаҙаҡ арпа биреү, хәлле кешегә йән башына 4 ҡаҙаҡ хөрмә, йә 8 ҡаҙаҡ йөҙөм биреү фарыз (бер ҡаҙаҡ - уртаса 400 грамм). Улар урынына ошо ризыҡтарҙың хаҡтарына тап килерлек итеп аҡса биреү ҙә дөрөҫ булыр. Хәҙистә: "Ғәйет көнөндә мохтаждарға фитыр саҙаҡаһы биреп, һораныуҙарынан ҡотҡарығыҙ", - тиелә. Икенсе төрлө әйткәндә, һеҙ байрам иткән көндәрҙә мохтаждар ҙа шатланһын, тамаҡтары туҡ булһын. Фитыр саҙаҡаһын биргәндә һәм алғанда уҡыла торған доғалар:
Саҙаҡа биргән кеше шулай тип доға ҡыла: "Бисмилләәһир-рахмәәнир-рахиим! Раббәнә, тәҡаббәл миннә иннәкә әңтәс-сәмиғүл-ғәлиим". Йә Раббым! Беҙҙән уны ҡабул ит! Сөнки Һин Ишетеүсе һәм Белеүсеһең. Әмиин!
Фитыр саҙаҡаһын алыусы кеше шулай тип доға ҡыла: "Бисмилләәһир-рахмәәнир-рахиим! Аллаһүммә тәҡаббәл фитратәһү үә сыйәмәһү, үәстәджиб доғаәһү, үәғфир ҙунүбәһү, үә әккид иимәәнәһү үә әкҫир әмүәәләһү, үә үәффиҡһүү ғәләә хайри мәҡаасыйдиһ". Йә, Аллаһым! (биреүсенең исеме, атаһының исеме әйтелә) фитыр саҙаҡаһын үә ураҙаһын, доғаһын ҡабул ҡыл һәм гонаһтарын ярлыҡа, һәм уның иманын ҡеүәтлә, малдарын арттыр һәм уны хәйерле маҡсаттарына ирештер.

"Киске Өфө" гәзите, №13, 2024 йыл

КИРЕ СЫҒЫРҒА