Өфөлә "Урал батыр" эпосына арналған һәйкәл барлыҡҡа килеүе ихтимал. Бындай башланғыс менән Бөтә донъя башҡорттары ҡоролтайы сығыш яһаны. Ваҡиғаны ике датаға - Башҡортостан автономияһының 100 йыллығына һәм 2020 йылдағы Бөтә донъя фольклориадаһына тура килтереү күҙ уңында тотола.

Әлеге көндә Урал батырға һәйкәлде һынландырған архитектура комплексы проекты бар. Уны Ағиҙел йылғаһы буйындағы урман зонаһында урынлаштырырға тәҡдим ителә. Рәсәйҙең Рәссамдар союзы ағзаһы, Башҡортостандың атҡаҙанған сәнғәт эшмәкәре, скульптор Хәйҙәр Ғарипов үҙенең тәҡдимен индергән. Автор башҡа башҡорт эпостарының персонаждарына арналған скульптура композицияларын урынлаштырып, тотош аллея булдырыуҙы күҙ уңында тота. Ҡоролтай Башҡарма комитеты рәйесе Әмир Ишемғолов етәкселегендә эшсе төркөм ойошторолған.
- "Урал батыр" эпосы - башҡорт халҡының символы, мираҫыбыҙ. Бөгөн ул донъя халыҡтары телдәренә тәржемә ителгән. Республикала эпосты яттан белгән кешеләр бар, уны конкурстарҙа һөйләйҙәр. Беҙ символдарҙы белергә, улар менән ғорурланырға һәм халыҡҡа күрһәтергә тейешбеҙ. Тимер юл буйлап ҡалаға ингән саҡта Салауат Юлаев ҡаршы ала. Аэропорт яғынан ингәндә лә шундай символ булһын ине, - ти Әмир Миңнеәхмәт улы. Уның әйтеүенсә, идеяны һәм уны хәл итеү юлдарын, тәү сиратта ғалимдарҙың фекеренә таянып, йәмәғәтселек вәкилдәре менән ентекле тикшереү зарур. Хәйер, зыялылар, ғалимдар бындай һәйкәл тураһында күптән һүҙ ҡуҙғата. Яҙыусы һәм ғалим Мирас Иҙелбаев: "Башҡортостанда Урал батырға һәйкәл кәрәклегенә шик юҡ. Республикабыҙ Европа менән Азия киҫешкән ерҙә урынлашҡан, "Урал батыр" эпосын иһә донъялағы ошондай мәҙәни ҡомартҡылар араһында иң боронғоһо, иң кешелеклеһе тип атарға мөмкин", - тип иҫәпләй. "Һәйкәлде төҙөгәндә бөтә нескәлектәргә иғтибар итеү мөһим. Урал батыр, эпостағы кеүек үк, арыҫлан өҫтөндә ултырырға, кейеме лә ошо дәүергә тап килергә тейеш", - тип билдәләй Тарих, тел һәм әҙәбиәт институтының фольклористика бүлеге мөдире Гөлнур Хөсәйенова.

Айгөл ШӘРӘФЕТДИНОВА.

КИРЕ СЫҒЫРҒА