1995 йылдың 1-2 июнендә Башҡортостандың яңы тарихында барса милләттәштәребеҙҙе рухландырған ҙур ваҡиға булып уҙҙы: баш ҡалабыҙ Өфөлә республикабыҙҙа, Рәсәйҙә, донъяның башҡа илдәрендә йәшәгән башҡорт халҡы вәкилдәре оло йыйынға - I Бөтә донъя башҡорттары ҡоролтайына йыйылды.

Ҡоролтайға һайланған 609 делегат араһында Венгрия, Германия, Франция, Польша, Латвия, Төркиә, АҠШ, Ҡытай, Гонконг, Перу һәм Көньяҡ Африка Республикаһында йәшәгән башҡорттарҙың вәкилдәре, Бойондороҡһоҙ дәүләттәр берләшмәһенең 6 иленән - 20, Рәсәйҙең 28 субъектынан 146 башҡорт кешеһе ҡатнашыуы ошо сараны ысынлап та бөтә донъя кимәленә күтәрҙе.
Делегаттар алдында Башҡортостандың Беренсе Президенты М.Ғ. Рәхимов ҙур доклад менән сығыш яһаны. Уның телмәрендә башҡорт халҡының, республикабыҙҙың тарихи үҫеше менән бәйле сағыу ваҡиғалар, уҙған быуаттың 90-сы йылдарында барған ҡатмарлы сәйәси-иҡтисади үҙгәрештәр осоронда халҡыбыҙ алдында торған проблемалар, милли дәүләтселек һәм федерализм мәсьәләләре, туған телебеҙҙе, мәҙәниәтебеҙҙе, милли традицияларыбыҙҙы һаҡлау һәм үҫтереү буйынса алда торған көнүҙәк маҡсаттар сағылыш тапты. "Тап беҙҙең республикабыҙ халҡыбыҙҙың берҙән-бер дәүләти берләшмәһе булып тора, һәм ул башҡорттарҙың барса рухи ҡиммәттәрен, теленең һәм мәҙәниәтенең барса байлығын, милли үҙенсәлек-тәрен һаҡларға һәм арттырырға бурыслы", - тигәйне Мортаза Ғөбәйҙулла улы.
Ҡоролтайҙың пленар һәм 10 секцияһы ултырыштарында сығыш яһаған делегаттар күтәреп сыҡҡан мәсьәләләр буйынса бик етди фекер алышыуҙар ерлегендә мөһим ҡарарҙар ҡабул ителгәйне, улар бөгөн дә актуаллеген юғалтмаған. Башҡортостандың халыҡ шағиры Мостай Кәримдең ҡоролтайға арналған шиғри ҡотлауында әйтелгән һүҙҙәре бөгөн дә ҡолаҡ төбөндә яңғырап торғандай:

"Хәсрәт түгел, хәстәр йыйҙы беҙҙе:
Туғанлыҡты кәрәк яңыртыуҙар,
Һүрелмәһен өмөт, һүнмәһен дәрт,
Һүнеп ҡалғанда ла янар тауҙар.

Йөҙәтмәһен әжәл юраусылар,
Беҙ булғанбыҙ, барбыҙ, буласаҡбыҙ,
Үҙебеҙҙең йырыбыҙҙы йырлап,
Тарих арбаһында барасаҡбыҙ".

"Киске Өфө" гәзите, №49, 12 - 18 декабрь 2025 йыл

КИРЕ СЫҒЫРҒА