"Киске Өфө" гәзитенең былтырғы 51-се һанында баҫылған "Иҫтә ҡалған яңы йыл" тигән мәҡәләне ҡыҙыҡһынып уҡый башланым. Ғәҙәттә, яңы йыл мажараларға бай була, бында ла шундай ҡыҙыҡ ваҡиғалар тураһында яҙылғандыр, тип уйланым. Етмәһә, авторы ла минең фамилиялаш - Фәүзиә Ҡотлогилдина.

Ғафури районының Ватан (Родина) ауылынан килгән был хат бер ҙә ҡыҙыҡ түгел, ә фәһемле һәм файҙалы ине. Ауыл старостаһы Фәүзиә ханымдың ауылдаштарына нисә йыл күрмәгән Яңы йыл байрамын ойоштороу өсөн нисек урын, аҙаҡ клуб даулап йөрөүҙәре, үҙе әйтмешләй, китап яҙырлыҡ, уның эшмәкәрлеге күптәргә өлгө булырлыҡ. Ауыл уртаһында павильон эшләтеп, халыҡҡа үҙе етештергән уңыштарын, шәхси хужалығынан артҡан әйберҙәрен һатырға мөмкинлек тә булдыра ул. Быныһы ла бик кәрәк эш. Сөнки бөтә кеше лә, бигерәк тә өлкән йәштәгеләр, мал тота алмай. Һөтөн, майын, ҡаймағын, эремсеген, ҡоротон, ҡатығын һатып алһа, әллә күпмегә етә. Һатҡан кешегә лә файҙа. Ә бит ауыл ерендә баҡса үҫтергән кешеләр ҡайнатмаһын да, компотын да, салаттарын да, тоҙланған әйберҙәрен дә үҙенән арттырып һата ала. Оло инәйҙәр ойоҡ, бейәләй, йөн тәпешкәләр бәйләп тәҡдим итергә мөмкин.
Быларҙы ниңә яҙам, тиһегеҙме? Күп ерҙәрҙә старосталарҙың исем өсөн генә һайлап ҡуйылыуын белгән өсөн яҙам. Күптәре шул силсәүит ойошторған сараларҙа ҡатнашыуҙан (дөрөҫөрәге, ҡарап тороуҙан) ары уҙмайҙар икәненә лә шаһит булған бар. Фәүзиә ханымдың мәҡәләһе "Киске Өфө" гәзитенә яңы рубрика тәҡдим итергә этәргес бирҙе: "Ауыл адвокаттары". Эйе, Башҡортостандың халыҡ шағиры Мостай Кәримдең дә шул исемдәге әҫәре бар. Ысынлап уйлап ҡарағанда, ауыл старосталары, адвокаттар кеүек, ауыл мәнфәғәтен яҡлап йөрөүселәр булырға тейеш бит. Күреүегеҙсә, Фәүзиә ханым үҙ ауылында павильон аса, клубҡа бина даулауға өлгәшә, аҙаҡ бинаның беренсе ҡатына ла хужа булып алалар. Һуңынан унда китапхана, медпункт, элемтә үҙәге урынлаша. Бер ҡатын ғына ни тиклем эш башҡарған! Бына, исмаһам, староста!
Әгәр гәзиттә "Ауыл адвокаттары" тигән рубрика асһағыҙ, бүтән ауылдарҙағы старосталар ҙа үҙҙәре башҡарған эштәр тураһында һөйләр, тәжрибә уртаҡлашыр ине. Бәлки, шуларҙы уҡып, ҡул ҡаушырып ҡына йөрөгән старосталар ҙа "уянып", дәртләнеп эш башлар. Бигерәк тә әлеге мәлдә, республикабыҙҙа "Айыҡ ауыл" конкурсы барған осорҙа, старосталарҙың эш тәжрибәһе менән уртаҡлашыуы файҙаға ғына булыр. Ысынында, ауыл халҡына бөтөн башланғыстарҙы күтәрмәләп йөрөгән Фәүзиә Ҡотлогилдина кеүек тынғыһыҙ, уйлы-ғәмле кешеләргә эйәреп, үҙ көнөн үҙе күрергә, үҙ биләмәһен үҙе һаҡларға, үҙе тәртип урынлаштырырға тейеш икәнен аңларға ваҡыттыр инде.

Зөһрә ҠОТЛОГИЛДИНА.
"Киске Өфө" гәзите, №2, 2022 йыл

КИРЕ СЫҒЫРҒА