Баш ҡалабыҙҙы көньяҡтан һәм көнбайыштан уратып аҡҡан Ағиҙел йылғаһының уң яҡ ярының бер өлөшө тотошлайға бетон менән ҡапланғас, халыҡ үтә лә ғәжәпкә ҡалғайны. Был тере йылғаны таш бығау менән тышап ҡуйған кеүек булды тәүге мәлдәрҙә. Ошондай "йәнһеҙ" мөхиттә ял итергә теләрме икән өфөләр, тип уйларға ла ерлек бар ине.

Әлбиттә, ошо йәнһеҙлекте йәмләрҙәй объекттар төҙөү кәрәклеген барыһы ла аңлай ине. Ҡала хакимиәтенең матбуғат хеҙмәте белдереүенсә, ошо биләмәне төҙөкләндереү, уның инфраструктураһын формалаштырыу ха-ҡында Өфө ҡала округы хакимиәте башлығы Ратмир Мәүлиев бер тапҡыр ғына сығыш яһаманы. Ул ошо үҙенсәлекле яр буйының берҙәм архитектура концепцияһын булдырыу зарурлығына баҫым яһап: "Ағиҙел йылғаһы ярын аҡрынлап объекттар менән тултыра барасаҡбыҙ, эштәрҙе ниндәй йүнәлештә һәм нисегерәк алып барыуҙы аңлау ҙа бар хәҙер", - тип асыҡлыҡ индерҙе.
Билдәләнеүенсә, бында бигерәк тә йәмәғәт туҡланыуы, һатыу итеү, күңел асыу зоналарына айырым иғтибар ителәсәк. Үткән аҙнала ғына яр буйында "Дуҫтар" тип аталған аттракциондар паркы эшләй башланы. Йәнә тиҙҙән яр буйына ял итергә килеүселәр саф һауала кино ла ҡарай аласаҡ. Өфө ҡалаһы хакимиәте киноэкран элеү мөмкинлеге һәм тамашасылар өсөн ултырыу урындары булған махсус япма-ҡоролманы йыйыу һәм ҡуйыу буйынса контракт төҙөнө. Кинотеатр модуленең оҙонлоғо - 8,5 м, киңлеге - 6 м, бейеклеге - 5 м. Был объект ҡарағас таҡтасыҡтар менән көпләнгән металл конструкциянан тора. Модулде ҡуйыусы ойошмаға эштәрҙе башҡарып сығыу өсөн 75 көн ваҡыт кәрәк буласаҡ.

"Киске Өфө" гәзите, №31, 2023 йыл

КИРЕ СЫҒЫРҒА