Юҡ, яңылыш уҡыманығыҙ! Тап шулай! Бөтә яҡлап өлгөр был йор һүҙле ағинәйҙәр Хәйбулла районының Татыр-Үҙәк ауылында йәшәй һәм әүҙем тормош алып бара.

Татыр-Үҙәк ауылындағы "Ағинәйҙәр ҡоро"н Раушания апай Таҡаева етәкләй. Өлкәнерәк йәштәге ағинәйҙәр (иң олоһона 72 йәш) бергә йыйылып, төрлө дини байрамдар үткәрә, халҡыбыҙҙың ғөрөф-ғәҙәттәрен, йолаларын тергеҙеү буйынса эштәр башҡара, төрлө ярыштар, ултырмалар ойоштора, ә иң мөһиме - был матур сараларға йәштәрҙе лә ылыҡтыра. Күмәкләп ҡул эштәре менән булышыу, йыр-моң кисәләре ойоштороу ҙа улар иңендә. Әле бына уларҙы саңғыла йөрөп ҡайтып килгән саҡтарында осраттым. Саф һауала йөрөп, кәйефтәре күтәрелеп, бит алмалары алһыуланып ҡайтып килгән көләс йөҙлө ағинәйҙәргә ҡарап һоҡланып туйманым. Бына бит, тормош ауырлыҡтарына зарланып ултырмайҙар, ауылдаштарында, яҡындарында киләсәктә барыһының да яйланырына өмөт уятырға тырышып, иманға килергә, матур тормошҡа ышанысты һаҡлап ҡалырға саҡыра улар. Ағинәйҙәребеҙгә һәр ваҡыт шулай ауылдаштарға таяныс булып, көр күңелле булып йәшәүҙәрен, дәрттәре һүрелмәүен теләйем!

Гөлкәй СӘМЕРХАНОВА.

КИРЕ СЫҒЫРҒА