Конгресс-холл эргәһендә төҙөлгән "Ватан" этнопаркы Башҡортостандың мәҙәниәтен сағылдырған йәйғор төҫөндә балҡыясаҡ. Бөгөн "этника", йәғни төбәктәрҙең милли һәм башҡа үҙенсәлектәренең донъя тренды булып тороуын иҫәпкә алып, ойоштороусылар шундай юл менән республиканы ШОС һәм БРИКС илдәре башлыҡтары саммитына килгән ҡунаҡтарға күрһәтәсәк.

Беренсе тирмәлә башҡорттарҙың көнкүреше сағылдырыласаҡ: унда республиканың аҫаба халҡы көндәлек тормошта ҡулланған йыһаздар (һандыҡтар, балаҫтар, көнкүреш әйберҙәре) урынлаштырыласаҡ. Бында тирмә биҙәү өсөн күп һанлы экспонаттар Милли музейҙан алына.
Икенсе тирмә халыҡ кәсепселегенә бағышлана, унда кейеҙ баҫыу, ағасты семәрләп эшләү, ҡымыҙ бешеү кеүек кәсептәр күрһәтелә.
Өсөнсө тирмә ер аҫты байлыҡтары менән таныштыра. Бында һүҙ нефть тураһында ғына бармай, сөнки Башҡортостанда Менделеев таблицаһының бөтөн элементтарын табырға була.
Дүртенсе тирмәлә крайҙың тәбиғәте, уның байлыҡтары, бал һәм ҡымыҙ менән танышырға, шунда уҡ был тәбиғи продукттарҙы тәмләп ҡарарға ла мөмкин.
Бишенсе тирмә - толерантлыҡ мөйөшө: республика элек-электән күп милләттәрҙең дуҫ һәм татыу йәшәүе менән билдәле.
Алтынсы тирмәлә милли кейемдәр кейеп ҡарарға һәм фотоға төшөргә, милли йолаларҙы күрһәтеүҙә ҡатнашырға мөмкин буласаҡ.
Етенсе тирмәлә Өфөнөң киләсәге күрһәтеләсәк. Архитектура проекттары, ҡала төҙөлөшө планы, күперҙәр, юлдар, юл сиселештәре, ҡыҫҡаһы, бер нисә йылдан баш ҡала үҙ йөҙөн тағы ла күркәмләндерәсәк икәне асыҡ сағылдырыласаҡ бында.

КИРЕ СЫҒЫРҒА