Ниһайәт, "Киске Өфө" гәзитенең "Вконтакте" социаль селтәрендәге "Башстатус" төркөмө менән берлектә иғлан иткән "Башҡорт китабы топ-100+" акцияһының тәүге ҡатнашыусылары төрлө әҫәрҙәрҙе уҡырға тәҡдим итә башланы.

Улар "Вконтакте" социаль селтәрендәге "Киске Өфө" гәзите" төркөмөндә махсус булдырылған "Башҡорт китабы топ-100+" акцияһы" тип аталған фекер алышыу битендә үҙ фекерҙәрен белдереп, уҡыған әҫәрҙәре тураһында бик матур баһаламалар яҙып ҡалдырған. Башҡорт халҡының быуындан-быуынға күсереп, аманат итеп тапшырып барырлыҡ, бөтәһе лә уҡып белергә тейешле китаптары/әҫәрҙәре тупланған исемлекте төҙөүгә булышлыҡ иткән акцияға тәүгеләрҙән булып башҡорт Википедияһын ойоштороусыларҙың береһе Рөстәм Нуриев ҡушылды. Түбәндә уның шиғри юлдарға һалынған тәҡдимен һеҙҙең иғтибарға тәҡдим итәбеҙ, хөрмәтле гәзит уҡыусылар.

"Йыл дауамы бараһы
"Киске Өфө" сараһы.
Тура килһен шартына
Китап алып ҡулыма,
100 әҫәре башҡорттоң
Исемлеген башлаған
"Урал батыр" ҡобайырын
Уҡып сыҡтым яңынан.
Йәше-ҡарты, барыһы
Хәтерендә торһасы,
Урал батыр васыяты
Яҡты маяҡ булһасы:
"Ат итеп тик Яҡшыны
Яман юлын быуығыҙ!"
Иңгә изге бурысты
Һалған олуғ бабабыҙ".

Киләсәк быуынды башҡорт халҡының рухи донъяһына ылыҡтырып үҫтереү тураһында уйланған һәр кем "Башҡорт китабы топ-100+" акцияһында әүҙем ҡатнашыр, тигән өмөттә ҡалабыҙ. Бының өсөн ни бары "Вконтакте" социаль селтәрендәге "Киске Өфө" гәзите" төркөмөндә махсус булдырылған "Башҡорт китабы топ-100+" акцияһы" тип аталған фекер алышыу битендә "#башкитап" хештегы ҡуйып, үҙ фекереңде яҙып ҡалдырыу кәрәк. Йә булмаһа, "Киске Өфө" гәзите редакцияһына хат ебәрергә мөмкин.

МӨХӘРРИРИӘТ.

КИРЕ СЫҒЫРҒА