"Киске Өфө" гәзитенең "Бәйләнештә" социаль селтәрендәге "Башстатус" төркөмө менән берлектә иғлан иткән "Башҡорт китабы топ-100+" акцияһына ҡушылған уҡыусыларыбыҙҙың тәҡдимдәрен һәр һанда күрһәтә киләбеҙ. Бөтәһе лә уҡырға тейешле китаптар исемлеге яйлап үҫә бара. Әлегә ул бына ниндәй:
1. "Урал батыр" башҡорт халыҡ эпосы
2. М. Аҡмулланың шиғырҙар йыйынтығы
3. Ҡол Ғәли "Йософ ҡиссаһы"
4. Ризаитдин Фәхретдин "Нәсихәттәр"
5. Ғайса Хөсәйенов "Тормош" һәм "Донъя" парсалар китаптары
Артабан киттек. "Башҡортостан" гәзите журналисы, йәш шағир Денис Ғилманов, Шәйехзада Бабичтың ижадын бөтәһе лә белергә тейеш, тигән фекерҙә.

- Мин иғтибарығыҙҙы милли әҙәбиәтебеҙҙең йондоҙо - Шәйехзада Бабичҡа, замандың ҡырҡыулашҡан мәлендә лә үткер һүҙен халыҡҡа еткергән, азатлыҡ йырсыһы булған даһи шәхесебеҙгә йүнәлтмәксемен. Нисек кенә ҡарама, ул тарихыбыҙҙың ҡараңғы төнөндә халҡына "нур сәсеп", киләсәккә юл яҡтыртҡан, юл ярған шағир. Йәш егеттең "Халҡым өсөн", "Әйҙә, милләт", "Көтәм" кеүек бер нисә шиғырын уҡыһаң да, милләтенең киләсәге өсөн хафаланыуын аңлайһың. Шул уҡ ваҡытта шағир түңкәрелештең ҡанлы мәхшәре эсенән донъя менән дә һоҡланып өлгөрә:
"Ултырҙым мин тауҙың күкрәгенә,
Йырҙар яҙам, елкәй, иҫмәй тор", - тигән шиғри юлдар ошо хаҡта һөйләй.
Йәнә Шәйехзада Бабичтың лирик шиғырҙарын да билдәләп китергә кәрәк. Түбәндәге күплет иҫкә төшә:
"Зәнгәр күҙкәйҙәрен зәңгәрләтеп,
Гүзәл ҡарай минең фәрештәм.
Аһ! Шул күҙҙәр миңә йәндән артыҡ,
Бәхет табам ҡарап тороштан"...
Өҫтәп шуны әйтергә мөмкин: "Ғазазил" поэмаһын яҙған кеше бер нисек тә ябай була алмай! Әле революция башланмаҫ элек үк "Марсельеза"ны йырлап, урам буйлап ҡыҙыл байраҡ күтәреп килгән колонналарҙы һүрәтләгән был әҫәрен, күрәҙәлек итеү, тип ҡабул итерлек. Ижады аша башҡорт әҙәбиәтенә жанр, строфа йәһәтенән һәм башҡа яңылыҡтар индергән, егерме дүрт йәшендә үҙ туған халҡы, намыҫ өсөн йәнен фиҙа ҡылған егеттән бөгөн дә йәштәр үрнәк, рухи тәрбиә ала. Хөрмәтле гәзит уҡыусыларыбыҙ! "Башҡорт китабы топ-100+" акцияһына һеҙ ҙә ҡушылығыҙ, үҙегеҙ уҡыған башҡорт китаптары/әҫәрҙәре араһынан иң лайыҡлыларын һайлап, шулар тураһында редакциябыҙға төбәп хаттар яҙығыҙ. Йәки "Бәйләнештә" социаль селтәрендәге "Киске Өфө" гәзите" төркөмөндә махсус булдырылған "Башҡорт китабы топ-100+" акцияһы" тип аталған фекер алышыу битендә "#башкитап" хештегы ҡуйып үҙ фекерегеҙҙе белдерегеҙ!

КИРЕ СЫҒЫРҒА