"Киске Өфө" гәзитенең "Бәйләнештә" социаль селтәрендәге "Башстатус" төркөмө менән берлектә иғлан иткән "Башҡорт китабы топ-100+" акцияһына ҡушылған уҡыусыларыбыҙҙың тәҡдимдәрен һәр һанда күрһәтә киләбеҙ. Бөтәһе лә уҡырға тейешле китаптар исемлеге яйлап үҫә бара. Әлегә ул бына ниндәй:
1. "Урал батыр" башҡорт халыҡ эпосы
2. М. Аҡмулланың шиғырҙар йыйынтығы
3. Ҡол Ғәли "Йософ ҡиссаһы"
4. Ризаитдин Фәхретдин "Нәсихәттәр"
5. Ғайса Хөсәйенов "Тормош" һәм "Донъя" парсалар китаптары
6. Шәйехзада Бабич, "Ғазазил" поэмаһы, шиғырҙар
7. Зәйнәб Биишева "Кәмһетелгәндәр" трилогияһы
8. Һәҙиә Дәүләтшина "Айбикә" повесы
9. Әхмәтзәки Вәлиди "Хәтирәләр"
Киләһе фекерҙе яҙыусы Рәсүл Байгилдиндан яҙып алдыҡ.

- Үткән һандарҙың береһендә Һәҙиә Дәүләтшинаның "Айбикә" повесын "Башҡорт китабы топ-100+" акцияһының исемлегенә индерергә тәҡдим иткәйнеләр. Әҙибәнең башҡорт әҙәбиәтендә классик әҫәр һаналған "Ырғыҙ" романын да был исемлектән төшөрөп ҡалдырмаҫҡа кәрәк. Был романда 1902-1922 йылдарҙағы тарихи ваҡиғалар, төрлө ҡатлам башҡорт кешеләренең көнкүреше, йәшәйеше тасуирлана. Әҫәр тарихи әһәмиәтенән тыш, һүҙ байлығы, халыҡсанлығы менән дә айырылып тора. "Ырғыҙ" романының башҡортса китабын да, рус теленә тәржемәһен дә ошо көндәрҙә яңынан уҡып сыҡтым. Айбулат Гөлйөҙөмдө урлап, кәләш итеп алыуы тасуирланған өҙөк буйынса хатта айырым фильм төшөрөрлөк! Шуға күрә, әҫәрҙең ошо юлдарының күсермәһен алып, Санкт-Петербург ҡалаһында кино төшөрөү өлкәһендә эшләгән кесе улыма ебәрҙем әле. Берәй режиссерға тәҡдим итһәң, бәлки, ҡыҙыҡһынырҙар, тим. Киләсәктә был күркәм әҫәр буйынса үҙебеҙҙең йәш режиссерҙар ҙа фильм төшөрөр, моғайын. Уға тиклем, тормош ауырлыҡтарына бирешмәй, ошо бөйөк әҫәрҙе ижад итергә үҙендә көс тапҡан Һәҙиә Дәүләтшинаның "Ырғыҙ"ын һәр кем үҙе уҡып, белергә тейеш.
Хөрмәтле гәзит уҡыусыларыбыҙ! "Башҡорт китабы топ-100+" акцияһына һеҙ ҙә ҡушылығыҙ, үҙегеҙ уҡыған башҡорт китаптары/әҫәрҙәре араһынан иң-иңдәрен һайлап, шулар тураһында редакциябыҙға төбәп хаттар яҙығыҙ. Йәки "Бәйләнештә" социаль селтәрендәге "Киске Өфө" гәзите" төркөмөндә махсус булдырылған "Башҡорт китабы топ-100+" акцияһы" тип аталған фекер алышыу битендә "#башкитап" хештегы ҡуйып үҙ фекерегеҙҙе белдерегеҙ!

КИРЕ СЫҒЫРҒА