Һорау: "Үҙегеҙҙең районығыҙҙа, ауылығыҙҙа, ҡалағыҙҙа, Башҡортостандың баш ҡалаһында оло юбилейға арнап, ниндәй объекттар төҙөлөүе, реконструкцияланыуы мөһим, тип иҫәпләйһегеҙ?"

Фәнирә ҒАЙСИНА, РФА-ның Өфө ғилми үҙәге Тарих, тел һәм әҙәбиәт институтының ғилми хеҙмәткәре: Башҡортостандың 100 йыллығына арнап 100 объект төҙөү йәки реконструкциялау акцияһында, минеңсә, тәү сиратта, Салауат Юлаев проспектындағы "Әр-Рәхим" мәсетен төҙөп бөтөрөү зарур. Сөнки барлыҡ мосолман илдәре үҙҙәренең мөһабәт һәм күҙ яуын алып торған мәсеттәре менән хайран итә, ә беҙҙә шулай "аһ" итерлек мәсет комплексы һаман да юҡ. Ләкин бының менән генә сикләнергә ярамай, ни тиһәң дә, Өфөлә мәсеттәр юҡ кимәлендә. Халҡы миллиондан ашҡан ҡала өсөн 7-8 генә мәсет бик аҙ. Бөгөн халыҡ динде танып, Аллаһы Тәғәләнән һыйыныу һәм яҡлау эҙләгәндә, барлыҡ мосолмандарҙың ихтыяжын ҡәнәғәтләндереү зарур, тип уйлайым. Бының өсөн улар ҡаланың бер осонан икенсеһенә түгел, ә яҡын-тирәләге мәсеткә йөрөргә тейеш.
Икенсенән, оптималләштереү һылтауы менән республика буйынса күпме мәктәп, медпункт, поликлиникалар ябылды. Уларҙы нисек тә ҡабаттан асыу ысулдарын табырға кәрәк, минеңсә. Мосолмандар өсөн хәләл ашханалары булған айырым поликлиникалар, мәктәптәр, балалар баҡсалары төҙөлһә лә насар булмаҫ ине.
"100 йыллыҡҡа - 100 объект" акцияһы аныҡ ҡулланылыштағы объекттарҙы ғына күҙаллаймы икән, әллә уға рухиәт талабындағы объекттар ҙа инәме? Әгәр шулай булһа, мин йылдар дауамында башҡорт халҡының билдәле шәхестәренә, батырҙарына һәйкәл, бюстар ҡуйыу тураһында күтәрелгән тәҡдимдәрҙе тап бөгөн тормошҡа ашырыу ваҡыты етте, тип уйлайым. Сөнки республиканың оло юбилейында тап башҡорт батырҙары данланырға тейеш, минеңсә.

Шәрифә САЛАУАТОВА яҙып алды.

КИРЕ СЫҒЫРҒА