Өфө - Башҡортостандың ғына түгел, ул беҙҙең әҙәбиәтебеҙҙең дә, мәҙәниәтебеҙҙең дә, сәнғәтебеҙҙең дә баш ҡалаһы. Республика яҙыусыларының күпселеге бында йәшәй. Театрҙарыбыҙ, ижади союздарыбыҙ, юғары уҡыу йорттары ошонда урынлашҡан. Баш ҡалала республика гәзит-журналдары нәшер ителә, китаптарыбыҙ баҫыла. Тимәк, беҙҙең яҙмышыбыҙ ҙа, хеҙмәтебеҙ ҙә уртаҡ.

Өфөлә һуңғы йылдарҙа яңы объекттар, ҡала биҙәге булырҙай урындар, ял зоналары барлыҡҡа килә. Быға тиклем Шиғриәт байрамдарын Салауат Юлаев майҙанында үткәреп килһәк, былтыр уны Этноауыл эргәһендә ойошторҙоҡ. Был ауыл беҙҙең ҡала өсөн бөтөнләй яңы күренеш, асыш булды. Быйыл иһә шағирҙарҙы Ете ҡыҙ фонтаны үҙенә йыйҙы.
Мин үҙем Ырымбур өлкәһенән. Ауылыбыҙ ҙур түгел, 80 самаһы йорт. Ауылдың урта мәктәбендә бөтөн фәндәрҙе тик башҡорт телендә уҡыуға ҡарамаҫтан, юғары белем алыусыларыбыҙҙы һанаһаҡ, 40-50 кеше булыр.
Башҡортостанға барыу, Өфөнө күреү, Урал тауҙарына менеү, Ағиҙелдә һыу инеү бала саҡтан күңел түремдә йәшәгән иң ҙур хыялым ине.
1957 йылда яңы ғына асылған Башҡорт дәүләт университетына уҡырға инергә документтар һәм имтихандар тапшырырға килдем. Автобус төндә генә килеп етте һәм Ленин урамы менән Пушкин урамы сатындағы магазинға яҙылған "Балыҡ" тигән атаманы уҡып, аптырауымдың сиге булмағайны. Сөнки "рыба" тигәнгә өйрәнгәнбеҙ, баҡтиһәң, балыҡ тип тә яҙырға мөмкин икән! Артабан яҙылған "аҙыҡ-түлек" тигән яҙыу ҙа сәйер тойолдо. Башҡортса уҡыһаҡ та, ҙур ҡалала башҡортса яҙыуҙарҙы күреү минең өсөн аптырарлыҡ, иҫ китерлек яңылыҡ булды.
Ә хәҙер урамдарҙағы башҡорт колориты, башҡортса яҙыуҙар, башҡорт телендәге аралашыуҙар, телерадио тапшырыуҙар, башҡорт матбуғаты минең өсөн ғәҙәти хәл, норма, тормошомдо ошо башҡортса яҙыуҙарһыҙ, башҡорт теленең ҡулланылышынан башҡа күҙ алдына ла килтермәйем.

Рауил БИКБАЕВ, Башҡортостандың халыҡ шағиры.

КИРЕ СЫҒЫРҒА