"Башҡорт китабы топ-100+" акцияһына килгән тәҡдимдәр, ниһайәт, күбәйә башланы. Тиҙ арала һәр быуын башҡорто уҡырға тейешле китап/әҫәрҙәр исемлеген гәзит уҡыусылар ярҙамы менән теүәлләп, билдәләп бөтөргә өмөт итәбеҙ.

43. Ғәлим Хисамов "Тамып та ғына ҡала ҡандары" романы. "Китапта башҡорт халҡының азатлыҡ өсөн көрәштәге киҫкен ваҡиғалар сағылдырыла, милли үҙаң мәсьәләләре бөгөнгөләр менән бәйләп күрһәтелә. Аҡыллы, халҡы өсөн ғәзиз ғүмерен йәлләмәгән 20-25 йәшлек кенә егет-ҡыҙҙар дан тураһында түгел, кешеләргә яҡшы тормош, азатлыҡ килтереү тураһында уйлаған һәм киләсәкте ҡайғыртҡан бит. Был китапты илай-илай уҡыным", - тип яҙа Өфө районынан уҡыусыбыҙ Тәслимә Йәмилева.

44. Әхиәр Хәкимов "Думбыра сыңы" романы. Һабрау сәсән тураһында тарихи сығанаҡтарҙа бик күп мәғлүмәттәр һаҡланмаған. Шуға был романды тарихи сығанаҡҡа тиңләп булмай, әммә унда халыҡты яҡлап һүҙ әйтә алған үткер телле, аҡыллы, уҡымышлы сәсән ниндәй булырға тейеш икәнлеге сағыла. Иң мөһиме, Әхиәр Хәкимовтың был әҫәре әҙәбиәткә, башҡорт халҡының мәшһүр шәхестәренең биографияһына, тарихи үткәненә ҡарата ҡыҙыҡһыныу уята. Шулай уҡ, мауыҡтырғыс романдың теле иҫ китмәле бай. Һәр быуын башҡорто был романды уҡып, Һабрау сәсән һәм ул йәшәгән тарихи осор тураһында белә ала.

45. Кирәй Мәргән "Бөркөт ҡанаты" романы. XVI быуат ваҡиғаларына арналған был роман дүрт китаптан тора. "Тарҡалыш", "Аманат", "Шартлау" һәм "Юлдар" тип аталған китаптарҙа башҡорт ырыуҙарының үҙ-ара мөнәсәбәттәре, билдәле тарихи шәхестәрҙең яҙмышы, тарихи ваҡиғалар һүрәтләнгән. Әҫәрҙә Тамъян ырыуы түрәһе Шаҡман һәм уның улы Шәғәле образдарына бәйләп, дәүләт ҡоролошондағы үҙгәрештәр, төрлө ханлыҡтар һәм Рус дәүләте араһындағы мөнәсәбәттәр тураһында яҙыла.
Хөрмәтле гәзит уҡыусыларыбыҙ! "Башҡорт китабы топ-100+" акцияһына ҡушылығыҙ, үҙегеҙ уҡыған башҡорт китаптары/әҫәрҙәре араһынан иң-иңдәрен һайлап, шулар тураһында редакциябыҙға төбәп хаттар яҙығыҙ. Йәки "Бәйләнештә" социаль селтәрендәге "Киске Өфө" гәзите" төркөмөндә махсус булдырылған "Башҡорт китабы топ-100+" акцияһы" тип аталған фекер алышыу битендә "#башкитап" хештегы ҡуйып, үҙ фекерегеҙҙе белдерегеҙ!

КИРЕ СЫҒЫРҒА