Февраль башында Өфө ҡала округы хакимиәте башлығы Ирек Ялалов етәкселегендәге рәсми делегация Астана ҡалаһына барып ҡайтты. Сәфәр маҡсаты Өфө менән Астана араһында туғандашлыҡ булдырыу, ошо хаҡтағы меморандумға ҡул ҡуйыу ине. 3 февралдә Ирек Ялалов менән Астана ҡалаһы хакимы Асет Исекешев документҡа ҡултамғаларын һалып, ниәттәрен нығытты.

- Астана менән туғанлашыу мөһим әһәмиәткә эйә - Өфө халыҡ-ара аренала халыҡ-ара масштабтағы ваҡиғалар үҙәге һәм донъя иҡтисадында эре мөһим уйынсы булараҡ позицияларын нығыта, - тип билдәләне Өфө ҡала округы хакимиәте башлығы урынбаҫары Илдар Хәсәнов. - Был документ муниципалитеттарҙың ҡеүәтен тулыһынса файҙаланыу һәм идара итеү һөҙөмтәлелеген күтәреү өсөн яңы перспективалар асасаҡ, хеҙмәттәшлектең инновацион формаларын үҫтереүгә булышлыҡ итәсәк.
Өфө делегацияһы алдында торған мөһим бурыстарҙың тағы береһе - Астаналағы коллегаларының ҡала хужалығын алып барыу, архитектура, юл төҙөлөшө мәсьәләләрен хәл итеү тәжрибәһен өйрәнеү. Эш программаһы барышында делегация "Астангенплан" проект институты эше менән танышты. Шулай уҡ тулы цикллы белем биреү Ҡаҙаҡ милли мәктәп-интернатында ла булдылар. Был уҡыу йортона эләгеү өсөн балалар ҙур конкурс һынауы үтә, әммә уҡырға ингәс, белем алыу процесы сығымдарының 70 процентын дәүләт үҙ өҫтөнә ала. Ҡаҙағстан Президенты Нурсолтан Назарбаевтың тормошона һәм эшмәкәрлегенә арналған материалдар тупланған Назарбаев-үҙәк мәғариф-музей учреждениеһында, Астана Экспо - 2017 үҙәк офисында, спорт объекттарында булды Өфө вәкилдәре.
Бынан тыш, делегация Астанала Эре ҡалалар һәм баш ҡалалар ассамблеяһының эше буйынса ла осрашыуҙар үткәрҙе. Сөнки Ирек Ялалов МАГ Президенты ла. Уның менән МАГ-тың башҡарма вице-президенты Владимир Селиванов та ойошманың артабанғы эшмәкәрлеге мәсьәләләре буйынса фекер алышыуҙарҙа, Ассамблеяның сираттағы сессияһын ЭКСПО сиктәрендә июлдә үткәреү мәсьәләләрен тикшереүҙә ҡатнашты.
Осрашыуға йомғаҡ яһап, Ирек Ишмөхәмәт улы Астана тәжрибәһен Өфөлә лә ҡулланыу ихтималлығын, шулай уҡ эшлекле, мәҙәни бәйләнештәрҙе үҫтереү, берлектәге проекттарҙы тормошҡа ашырыу күҙалланыуын, артабан туғанлыҡ ошо ҡалаларҙың райондары араһында ла булдырыласағын белдерҙе.

Мария ӘҘИӘТУЛЛИНА.

КИРЕ СЫҒЫРҒА