"Башҡорт китабы топ-100+" акцияһына килгән хаттарҙы барлыуҙы дауам итәбеҙ. Һеҙ ҙә башҡорт әҙәбиәтендә һәр быуын кешеһенең иғтибарына лайыҡ әҫәрҙәрҙе/китаптарҙы тәҡдим итеүҙән туҡтамағыҙ, хөрмәтле гәзит уҡыусылар!

46. Булат Рафиҡов "Ҡурсаҡ театры", "Ҡар һыуы", "Ҡырынҡабаҡ", "Бүреләр", "Яңғыҙ иргә ҡыйын", "Көсләү" хикәйәләре. "Булат Рафиҡов "Әҫәрҙәр"енең икенсе томына индерелгән ошо хикәйәләрҙе "Башҡорт китабы топ-100+" акцияһы исемлегенә индерергә тәҡдим итәм. Был хикәйәләрҙә ябай тормоштағы ябай кешеләрҙең яҙмыштары, хәл-кисерештәре күрһәтелә. Әммә шул ябайлыҡтан да иғтибар итерлек төшөнсәләр, күҙгә-башҡа күренмәҫтәй кешеләрҙең үҙенсәлекле яҡтарын, тәбиғәттең ябай күҙгә күренмәҫ мөғжизәләрен таба белгән автор. Булат Рафиҡов хикәйәләренең тәрбиәүи йоғонтоһо ҙур. Үрҙә ҡарап үтелгән һәр әҫәрҙә ниндәй ҙә булһа яҡшы төшөнсәләргә өндәү, насарҙы миҫалдарҙа, хаталарҙа күрһәтеү күҙәтелә килә. Мәҫәлән, "Ҡырынҡабаҡ" хикәйәһендә халыҡ өсөн ғүмерен биргән халыҡ батырҙарын онотоу, уларҙың ҡәберҙәрен юғалтыу ярамағаны һәм ҡырын эштең ҡырҡ йылдан һуң да беленәсәк икәне әҫәрҙәге хәл -ваҡиғалар аша һүрәтләнә. "Ҡар һыуы"нда иһә тыуған ергә, ауылға хыянат итеүҙең, һине кеше иткән ергә төкөрөп ҡарауҙың ниндәй күңелһеҙ һөҙөмтәләр биреүе һәм аңһыҙлыҡтың, тупаҫлыҡтың ниндәй ҡурҡыныс көс була алыуы күрһәтелә. Хикәйәләрҙәге һәр герой характерында, һәр сағылыш тапҡан ваҡиғала тигәндәй йәшерен фәлсәфә ята. Бары анализлап, уйланып, фаразлап ҡына әҫәрҙәрҙең маҡсатын, тәрбиәүи төшөнсәһен аңларға була", - тип яҙа Сибай ҡалаһынан Лилиә Ғиләзетдинова.
"Башҡорт китабы топ-100+" акцияһына ҡушылығыҙ, үҙегеҙ уҡыған башҡорт китаптары/әҫәрҙәре араһынан иң-иңдәрен һайлап, шулар тураһында редакциябыҙға төбәп хаттар яҙығыҙ. Йәки "Бәйләнештә" социаль селтәрендәге "Киске Өфө" гәзите" төркөмөндә махсус булдырылған "Башҡорт китабы топ-100+" акцияһы" тип аталған фекер алышыу битендә "#башкитап" хештегы ҡуйып, үҙ фекерегеҙҙе белдерегеҙ!

Рубриканы Сәриә ҒАРИПОВА алып бара.

КИРЕ СЫҒЫРҒА