Ысын башҡортто атһыҙ, уҡ-һаҙаҡһыҙ күҙ алдына ла килтереп булмаҫ ине. Ат әле лә уның ҡанаты, тоғро юлдашы булып ҡала килә, ә бына онотола яҙып барған уҡ-һаҙаҡ традицияһын тергеҙеп, егеттәребеҙ бик маҡтаулы, изге эш башлап ебәрҙе.

"Любизар" 1-се Башҡорт атлы полкы хәрби-тарихи клубы башланғысы менән ойошторолған "Мәргән уҡсы" фестивале йәштәр араһында иҫ киткес популярлыҡ яуланы. Һуңғы араларҙа ғына ла ошо фестиваль сиктәрендә бер нисә тапҡыр уҡ атыу бәйгеһе булып алды. Шундай ярыштарҙың сираттағыһы, Ҡарас сәсәнгә арналғаны, ошо көндәрҙә генә Учалы районының Уральск ҡасабаһында үтте. Унда Учалы, Әбйәлил, Ғафури, Бөрйән, Хәйбулла райондарынан, Сибай һәм Өфө ҡалаларынан, Силәбе өлкәһенән 50-нән ашыу мәргән ҡатнашты. Ир-егеттәр - 27 һәм 25, ә ҡатын-ҡыҙҙар 20 һәм 15 метр алыҫлыҡтан сәптәргә атты.
Әйткәндәй, шуныһы ҡыуаныслы: ир-егеттәр менән бер ҡатарҙан мәргәндәр бәйгеһендә ҡатын-ҡыҙҙар ҙа уҡ ата. Матур күренеш, ләкин быға ғәжәпләнергә түгел: халҡыбыҙ тарихынан белеүебеҙсә, ҡатын-ҡыҙҙарыбыҙ саялыҡта ир-егеттәрҙән бер ҙә ҡалышмаған: атта ла сапҡан, яуҙа ла ҡатнашҡан, мәргән уҡсы ла булған. Тап ана шул сифаттарҙың бөгөнгә ҡәҙәр аңыбыҙға ла, ҡаныбыҙға ла һеңеп ҡалғанлығын, ләкин уны "уятырға" бер ҡасан да һуң булмауын иҫбат итә лә инде ҡыҙҙарыбыҙ. Улар араһында байтаҡ мәрәй йыйыуға өлгәшкән һәм, күп егеттәрҙең "үксәһенә баҫып," финалға сығыусы ун ике кеше араһында берҙән-бер гүзәл зат - юрматы һылыуы, "Киске Өфө" гәзите хеҙмәткәре Алһыу Кинйәбаеваның булыуы бөтәбеҙ өсөн дә ҡыуаныс һәм ғорурлыҡ булды. Ә шулай ҙа был милли спорт төрөнөң тағы ла күберәк егеттәребеҙ йөрәген ҡуҙғытыуын, сәм уятыуын теләйек.

Фәүзиә ИҘЕЛБАЕВА.

КИРЕ СЫҒЫРҒА