"Тамыр" балалар һәм үҫмерҙәр телеканалы эшмәкәрлеген ниндәй һүҙҙәр менән баһалаһаң да аҙ булыр төҫлө. Ҡапыл шундай фекер башҡа килә: "Тамыр" һүҙен төҙөгән хәрефтәр үҙе үк улар эшмәкәрлегенә бер ҡылыҡһырлама була ала, имеш: талант, аҡыл, милләт, ырыҫ, рух. Ысынлап та, 25 йыл дауамында "Тамыр" талантлы, аҡыллы, милләттең киләсәген тәшкил иткән ырыҫлы, рухлы балалар тәрбиәләүсе ойошмаға әйләнде. "Башҡортостан" дәүләт концерт залында үткән "Бейеклектәр яулайбыҙ" исемле байрам концерты тамашасыны ошо хәҡиҡәткә тағы бер тапҡыр инандырҙы.

Сирек быуат эсендә "Тамыр" телеканалы яулаған бейеклектәр, уңыштар, наградалар һанап бөткөһөҙ. Был коллектив республикалағы тәүге "Алтын Орфей" хужаһы, "Тефи-регион" конкурсында әллә күпме еңеүҙәр яулаған, "Включайся" Халыҡ-ара балалар телевидениеһы фестиваленең төрлө номинациялар призеры. Бөгөн беҙ Башҡортостан юлдаш телеканалын балалар өсөн башҡортса тапшырыуҙар, әкиәттәр, конкурстар, фильмдарһыҙ күҙ алдына ла килтерә алмайбыҙ. "Тамыр"ҙа күрһәтелгән йәнһүрәттәр, тапшырыуҙар геройҙары башҡорт телендә һөйләшеп кенә ҡалмай, ә кескәй тамашасыларында милли рух, зауыҡ, башҡорт халҡының йолаларына, тарихына ҡарата ихтирам да тәрбиәләй. Был тәрбиә емештәрен беҙ йыл да үткәрелгән концерт тамашаһында ла күҙәтәбеҙ, сөнки унда сәхнәлә сығыш яһаусы балалар ҙа, уларҙы тамаша ҡылған кескәйҙәр ҙә башҡортса һөйләшә, башҡорт көйҙәренә бейей, шиғырҙар һөйләй. Тимәк, "Тамыр" балалар һәм үҫмерҙәр телеканалы беҙҙең сабыйҙарға бәләкәйҙән үҙ моңон һөйөргә, үҙ көйөн көйләп, туған халҡы һәм теленә битараф булмаҫҡа өйрәтә.
Эйе, балаларын халҡыбыҙҙың күркәм йолалары, рухиәте нигеҙендә тәрбиәләүҙе төп бурысы итеп күргән ата-әсәләр "Тамыр" телеканалының даими дуҫтарына әйләнгән. Ундай аңлы, алдынғы фекерле ата-әсәләребеҙ байтаҡ - ике көн үткәрелгән концертта "Башҡортостан" дәүләт концерт залы шығырым тулы булды. Кескәй тамашасыларҙың шатлыҡтан балҡыған йөҙҙәрен ситтән генә күҙәтеп тороп та, уларҙың ниндәй оло тәьҫораттар алып ҡайтасағын күҙ алдына килтерергә була ине. Баш ҡала сабыйҙарына ғына түгел, бөтә республика балаларына бәхетле хәтирәләр бүләк иткән, уларҙың рухын үҫтергән "Тамыр" балалар һәм үҫмерҙәр телеканалына киләсәктә ижади уңыштар, рәхмәтле тамашасылар, яңы еңеүҙәр юлдаш булһын!

Ғәлиә ШӘМСЕТДИНОВА.

КИРЕ СЫҒЫРҒА