6-12 июлдә илдең баш ҡалаһында Мәскәү урбанистика форумы (Moscow Urban Forum - 2017) - глобаль мегаполистарҙы үҫтереүгә арналған ҙур халыҡ-ара конгресс үтте. Ул 2011 йылдан даими уҙғарыла һәм Рәсәйҙең, донъяның ҡалалар хакимиәттәре вәкилдәрен, архитекторҙарҙы, ҡала үҫешен күҙаллаусыларҙы, финанс компаниялары етәкселәрен, инвесторҙарҙы һ.б. бергә туплай.

Быйыл Мәскәү урбанистика форумы тарихында беренсе тапҡыр 400-ҙән ашыу спикер, эшлекле программала донъяның 40 иленән 11 мең ҡатнашыусы һәм сараға килеүсе 30 мең кеше теркәлә. Сараның төп темаһы: "Агломерациялар дәүере. Донъяның яңы картаһы".
Өфө ҡала хакимиәте башлығы Ирек Ялалов йыл һайын унда эксперт булараҡ сығыш яһай. Быйыл ул ҙур ҡалаларҙа һалым һәм һалым булмаған түләүҙәрҙән һуң финанс ресурстарының 8-10 проценты ғына ҡалыуын билдәләп: "Һуңғы ике йылда Өфө Ҡытайҙың өс ҡалаһы менән туғанлашыу тураһында килешеү төҙөнө. Уларҙа бюджет сәйәсәте түбәндәгесә ҡоролған: 33 процент ҡалала ҡала, 33 процент - төбәк хөкүмәтенә, 33 проценты Пекинға күсерелә. Өфөнө алып ҡараһаҡ, финанс ресурстарының өстән бер өлөшө - республикала, 10 процент самаһы баш ҡалала ҡала, ҡалғаны федераль үҙәккә китә. Әгәр Рәсәйҙә шундай бюджет-ара сәйәсәт тормошҡа ашырыла икән, беҙгә ҡабаттан Советтар Союзы дәүеренә кире ҡайтырға кәрәк", - тине. Былай тип әйтеүҙең етди нигеҙе лә бар, сөнки 100 йыл элек Өфөлә 60 мең самаһы кеше йәшәй, Бөйөк Ватан һуғышы йылдарында - 200 меңдән ашыуыраҡ. Уҙған быуаттың 50-се йылдарында Өфө менән Черниковка тоташа, 80-се йылдарҙа ҡала халҡының иҫәбе миллионға барып етә. Барлыҡ инфраструктура, шул иҫәптән трамвай юлдары, күперҙәр һ.б. ул саҡта үҙәктән финанслана.
Ирек Ишмөхәмәт улы белдереүенсә, бөгөн миллионлы ҡалалар бигүк уңышлы старт һыҙығында түгел, яҡшы методологик һәм финанс ярҙамы булғанда ғына уның етди үҫешенә өлгәшеү мөмкин. "Шуға ла беҙгә миллионлы ҡалаларҙағы һәм эре агломерацияларҙағы алдынғы инфраструктура проекттарын федераль үҙәк тарафынан финанслау мәсьәләһенә кире ҡайтырға кәрәк", - тине Ирек Ишмөхәмәт улы.

КИРЕ СЫҒЫРҒА