Бөтәһе лә нимәлер етештерә, нимәлер һата бит бөгөн. Баҙар иҡтисады башланыу менән берәү баҙарҙа "Бешерелгән йомортҡалар" тип аталған киоск асып ебәргән, ти. Шул уҡ баҙарҙан йомортҡалар һатып ала ла, өйөнә алып ҡайтып бешерә лә, шул уҡ хаҡҡа һата ти был. Был эште күреп, дуҫҡайы: "Һин ни өсөн улай итәһең, ниндәй файҙа алаһың һуң?" - тип һорай ҡуйған. Ә "бизнесмен": "Беренсенән, йомортҡаларҙы бешергәс, һурпаһы ҡала, икенсенән, һәр саҡ эш менән мәшғүлмен", - тип яуаплаған, ти.

Шуның кеүек, беҙҙең ил дә һәр саҡ эш менән мәшғүл. Йә паспорттар алыштырабыҙ, йә льготалар бирәләр, йә кире алалар, йә яңы медицина полистары уйлап сығаралар, милицияны полицияға әйләндерәләр - халыҡтың һәр саҡ ҡыбырлап тороуы кәрәк. Буш мәшәҡәттәр уйлап табып ҡына торола. Берәүҙәр анкета тултыра, ә икенселәр уларҙы һаҡлап йөрөй. Шунан: "Был эштәрҙе үткәреү өсөн бик күп аҡса сарыф ителә", - тип телевизор аша һөйләйҙәр. Эйе, илебеҙ етәкселәре лә, халҡы ла һәр саҡ эш менән мәшғүл һәм ул эштең халыҡ өсөн һөҙөмтәһе йомортҡа бешергәс ҡалған һурпалай. Бына шулай йәшәйбеҙ инде...

Фәүзиә ЯХИНА.

КИРЕ СЫҒЫРҒА