"Башҡорт китабы топ-100+" акцияһына килгән хаттарҙы барлыуҙы дауам итәбеҙ. Һеҙ ҙә башҡорт әҙәбиәтендә һәр быуын кешеһенең иғтибарына лайыҡ әҫәрҙәрҙе/китаптарҙы тәҡдим итеүҙән туҡтамағыҙ, хөрмәтле гәзит уҡыусылар!

73. Жәлил Кейекбаев "Туғандар һәм таныштар" романы. "Башҡорт теленең һүҙ байлығы ифрат бай булыуын һәр кем белә, ләкин беҙ телмәрҙә шул һүҙҙәрҙең өстән бер өлөшөн дә ҡулланмайбыҙҙыр әле. Сөнки З. Сиразитдинова һәм Г. Шәмсетдинова төҙөгән "Башҡорт теленең йышлыҡ һүҙлеге"нә 10473 һүҙ индерелгән. Заман башҡорто оло быуын кешеләре әйткән ҡайһы бер һүҙҙәрҙе аңламаҫҡа ла мөмкин. Шуға мин башҡорт әҙәби тел һүҙлектәрендә осрамаған һүҙҙәр, мәҡәл-әйтемдәр, фразеологик берәмектәр менән танышырға теләгән милләттәштәргә Жәлил Кейекбаевтың "Туғандар һәм таныштар" романын уҡып сығырға тәҡдим итәм. Яҙыусының был әҫәре "Башҡорт китабы топ-100+" акцияһы исемлегенә был сәбәптән генә түгел, ә авторҙың романға индерелгән осорҙа йәшәгән халыҡ образын тулыһынса күҙ алдына баҫтыра алыуы өсөн дә индерелергә тейеш, тип иҫәпләйем. Ил тигәндең кеме юҡ, бөтәһе лә "Туғандар һәм таныштар" романы биттәрендә сағылыш тапҡан, башҡорт халҡының йолалары, ғөрөф-ғәҙәте, көнкүреше һүрәтләнгән", - тип яҙа Өфөнән Нәркәс Айсыуаҡова.
"Башҡорт китабы топ-100+" акцияһына ҡушылығыҙ, үҙегеҙ уҡыған башҡорт китаптары/әҫәрҙәре араһынан иң-иңдәрен һайлап, шулар тураһында редакциябыҙға төбәп хаттар яҙығыҙ. Йәки "Бәйләнештә" социаль селтәрендәге "Киске Өфө" гәзите" төркөмөндә махсус булдырылған "Башҡорт китабы топ-100+" акцияһы" тип аталған фекер алышыу битендә "#башкитап" хештегы ҡуйып, үҙ фекерегеҙҙе белдерегеҙ!

КИРЕ СЫҒЫРҒА