Дәүләт милли телдәрен мотлаҡ уҡытыу уҡыусыларҙың хоҡуғын боҙмай!

Был хаҡта Рәсәй Федерацияһының мәғариф һәм фән министры Ольга Васильева 30 августа Бөтә Рәсәй ата-әсәләр йыйылышында белдерҙе, тип хәбәр итә REGNUM мәғлүмәт агентлығы.
Ул РФ Конституция судының вердиктын да хәтергә төшөрә. Белеүегеҙсә, Конституция суды быға тиклем Татарстан мәктәптәрендә татар теленең дәүләт теле булараҡ уҡытылыуы, әгәр ул имтихандар тапшырыуға һәм юғары уҡыу йорттарына инеүгә ҡамасауламай икән, һәр кемдең тәрбиә һәм белем биреү телен һайлауға хоҡуҡ иреклеген боҙмауы тураһында һығымта яһағайны.
"Беҙ - күп милләтле, күп конфессиялы ил. Изгелекле мөнәсәбәт - ул эргәңдә йәшәүселәрҙең мәҙәниәтен белеү, көнкүреш кимәлендә телен дә белеү ул... Минеңсә, Башҡортостан йәки Татарстан территорияһында тыуып, шунда йәшәп, телде белмәһәң, был бигүк дөрөҫ булмаясаҡ", - ти министр.
Быға тиклем Ольга Васильеваға Татарстан мәктәптәрендә туған тел булмаған телдәрҙе уҡытыуға бәйле хәл-торош буйынса ялыуҙар килгеләгән. Йәғни, министр белдереүенсә, Татарстандың рус телле ата-әсәләре комитеты республикала туған телдәге "Туған тел" һәм "Әҙәби уҡыу" компоненты иҫәбенә татар телен һәм татар әҙәбиәтен мәжбүри уҡытыу факты тураһында хәбәр иткән булған. Шуға ла Рәсәй мәғариф һәм фән министры һәр аныҡ хәл-торошто айырым ҡарарға кәрәклеген билдәләй һәм үтенестәрҙе үҙенең исеменә ебәрергә саҡыра. "Беҙ хоҡуҡ боҙолоу осраҡтарын айырым тикшерәсәкбеҙ", - тип һығымта яһай ул.

КИРЕ СЫҒЫРҒА