Өфөнөң "Мираҫ" йыр һәм бейеү фольклор ансамбле сит илдән гастролдәрҙән ҡайтты. Алдан "Башинформ" агентлығы хәбәр итеүенсә, коллектив Венгрияла "Summerfest" халыҡ-ара фольклор фестивалендә Рәсәй Федерацияһы һәм Башҡортостан Республикаһының традицион мәҙәниәте менән таныштырҙы. Өфө артистарына маҡтаулы бурысты Поленов исемендәге Рәсәй дәүләт халыҡ ижады йорто йөкмәтте.
Фольклор байрамының һәр көнө сағыу ваҡиғаларға һәм тәьҫораттарға бай булды, тип уртаҡлашты "мираҫтар". 14 августа Сазхаломбатт ҡалаһында рәсми рәүештә фестивалде асыу һәм үҙәк урамдар буйлап коллективтар парады була. Шунда уҡ Изге Стефан майҙанында коллективтарҙың сығыштарынан тыш, халыҡ ижады йәрминкәһе ойошторола. Башҡортостан күргәҙмәһе милли кейемдәр, биҙәүестәр һәм төрлө сувенир продукцияһы менән барыһының да иғтибарын йәлеп итә. Биш көнлөк фестиваль программаһында ансамбль Сазхаломбатт, Тёкёль, Рацкеве, Будапешт ҡалаларында, шулай уҡ Дунай йылғаһы буйлап йөрөгән иң ҙур теплоходта ла сығыш яһай. Тамашасыларға "Сатыр эргәһендә", "Йәшлек", "Оҫта ҡуллы ҡатын-ҡыҙҙар", "Солтанаҡов" кеүек - башҡорт, "Калинка" һәм "Себер" рус бейеүҙәре тәҡдим ителә. Венгрияға ансамблдең бәләкәй төркөмө генә барыуына ҡарамаҫтан, уларҙың сығыштарын фестиваль директоры Джозеф Сигатвари һәм Сазхаломбатт ҡалаһы мэры Михай Везер юғары баһалай. "Мираҫ" ансамбле юғары башҡарыу кимәленә һәм ҙур ижади потенциалға эйә, тип билдәләй улар. Фестиваль сиктәрендә Өфө ҡала округы хакимиәте башлығы урынбаҫары Сынтимер Баязитовтың Сазхаломбатт ҡалаһы етәкселеге менән рәсми осрашыуы була. Осрашыуҙа Өфөлә 2020 йылда үтәсәк бөтә донъя Фольклориадаһын ойоштороу мәсьәләләре тикшерелә.

КИРЕ СЫҒЫРҒА