"Башҡорт китабы топ-100+" акцияһына килгән хаттарҙы барлауҙы дауам итәбеҙ. Һеҙ ҙә башҡорт әҙәбиәтендә һәр быуын кешеһенең иғтибарына лайыҡ әҫәрҙәрҙе/ китаптарҙы тәҡдим итеүҙән туҡтамағыҙ, хөрмәтле гәзит уҡыусылар!

97. Флорид Бүләков "Пьесалар". 2008 йылда баҫылған китапта авторҙың "Саҡ-суҡ", "Гөлбәзир", "Таштуғай", "Шырау", "Яран гөл" тигән пьесалары индерелгән. Драматургтың төрлө темаға ижад ителгән пьесалары Башҡортостан сәхнәләрендә генә түгел, Рәсәй һәм сит илдәр театрҙарында ҙур уңыш менән ҡуйыла. Билдәле драматургтың ижады менән театрға килеп танышыу мөмкинлеге булмаһа, уның пьесаларын уҡып сығырға кәрәк. Сөнки башҡорт кешеһе мәҙәниле, белем даирәһе киң булырға тейеш.

98. Мөхтәр Әхтәмов "Башҡорт халыҡ мәҡәлдәре һәм әйтемдәре һүҙлеге". Был ҙур китап һәр башҡорт кешеһенең шәхси китапханаһында лайыҡлы урын биләрлек йыйынтыҡ. Унда тупланған хазинаға торошло һүҙҙәр бөтә заманда ла кәрәкле, актуаль яңғырай. Сөнки уларҙа быуаттар буйлап аҡыл һәм тәжрибә тупланған. Һүҙлек ата-бабаларҙың аҡылын, кәңәшен сағылдырыу менән генә файҙалы түгел, телде, фольклорҙы өйрәнеүсе ғалимдар өсөн дә бик уңайлы. Автор унда башҡорт мәҡәлдәре һәм әйтемдәрендә ниндәй һүҙҙәр йыш ҡулланылыуын да күрһәтә алған. Башҡорт халҡының теле, холоғо, йолаһы, ҡағиҙәһе, йәшәү рәүеше, ғөрөф-ғәҙәттәре, инаныстары, донъяға ҡарашы, тормош тәжрибәһе йыйынтығы ул, Мөхтәр Әхтәмов төҙөгән һүҙлек. Уны "Башҡорт китабы топ - 100+" акцияһы исемлегенә индереү мотлаҡ кәрәк.
"Башҡорт китабы топ-100+" акцияһына ҡушылығыҙ, үҙегеҙ уҡыған башҡорт китаптары/әҫәрҙәре араһынан иң-иңдәрен һайлап, шулар тураһында редакциябыҙға төбәп хаттар яҙығыҙ. Йәки "Бәйләнештә" социаль селтәрендәге "Киске Өфө" гәзите" төркөмөндә махсус булдырылған "Башҡорт китабы топ-100+" акцияһы" тип аталған фекер алышыу битендә "#башкитап" хештегы ҡуйып, үҙ фекерегеҙҙе белдерегеҙ!

Рубриканы Сәриә ҒАРИПОВА алып бара.

КИРЕ СЫҒЫРҒА